內山兄坐車
https://www.youtube.com/watch?v=RPjP1UY4qhk&fbclid=IwAR2a1Y0wGYv8n9CoKkl7k48jIWcxkavquq6ni17fxWgskgjZjI_4evxUATk
《內山兄坐車》Lāi-suann-hiann Tsē-tshia
郭大誠Kueh Tāi-sîng
——————————————
內山兄坐牛車
lāi-suann-hiann tsē gû-tshia
欲去臺北城
beh khì Tâi-pak-siânn
到山跤換坐一台
kàu suann-kha uānn tsē tsi̍t-tâi
上北的火車
tsiūnn-pak ê hué-tshia
坐火車到臺北
tsē hué-tshia kàu Tâi-pak
換坐計程車
uānn tsē kè-thîng-tshia
看見著交通警察
khuànn-kìnn tio̍h kau-thong-kíng-tshat
佇咧指揮車
tī-leh tsí-hui tshia
車來車去
tshia lâi tshia khì
一時聽著觱觱仔聲
tsi̍t-sî thiann-tio̍h pi-pi-á siann
遊覽車公共汽車
iû-lám-tshia kong-kiōng-khì-tshia
三輪貨車吉普車
sann-lián-huè-tshia jì-puh-tshia
一隻隻攏來停車
tsi̍t-tsiah-tsiah khuè lóng lâi thîng-tshia
規路全是車
kui-lōo tsuân sī tshia
↓↓(口白)—(口白)—(口白)↓↓
內山兄坐一台牛車
lāi-suann-hiann tsē tsi̍t-tâi gû-tshia
欲去繁華的臺北城
beh khì huân-huâ ê Tâi-pak-siânn
誠歹運到山跤
tsiânn pháinn-ūn kàu suann-kha
牛車煞來跋落崎
gû-tshia suah lâi pua̍h-lo̍h kiā
害我摔一下
hāi guá siak tsi̍t-ē
險險仔無性命
hiám-hiám-á bô sìnn-miā
這件車禍
tsit kiānn tshia-hō
結果軋死兩隻狗蟻
kiat-kó kauh sí nn̄g-tsiah káu-hiā
牛車袂當行上害
gû-tshia buē-tàng kiânn siōng hāi
自按呢
tsū-án-ne
走去火車頭坐火車
tsáu-khì hué-tshia-thâu tsē hué-tshia
坐無偌久
tsē bô-guā-kú
火車就到了臺北城
hué-tshia tsiū kàu liáu Tâi-pak-siânn
落火車頭
lo̍h hué-tshia-thâu
煞予我著一驚
suah hōo guá tio̍h tsi̍t-kiann
看著街路
khuànn-tio̍h ke-lōo
車來車去全是車
tshia lâi tshia khì tsuân sī tshia
欲去北投
beh khì Pak-tâu
煞毋知欲坐佗一隻
suah m̄-tsai beh tsē tó tsi̍t-tsiah
好佳哉
hó-ka-tsài
一个司機大兄
tsi̍t-ê su-ki tuā-hiann
駛著計程車
sái tio̍h kè-thîng-tshia
叫我緊上車
kiò guá kín tsiūnn-tshia
向前開咧直直行
hiòng-tsîng khui eh ti̍t-ti̍t kiânn
行啊行
kiânn–ah kiânn
哎喲!忽然間去聽著
aih-iō! hut-jiân-kan khì thiann-tio̍h
交通的觱觱仔聲
kau-thong ê pi-pi-á siann
一路上的車
tsi̍t-lōo siōng ê tshia
一隻一隻攏來停車
tsi̍t-tsiah-tsi̍t-tsiah lóng lâi thîng-tshia
原來啊
guân-lâi–ah
就是一个五六歲的囡仔兄
tsiū-sī tsi̍t-ê gōo-la̍k huè ê gín-á-hiann
駛一台迷你的電動車
sái tsi̍t-tâi mini ê tiān-tōng-tshia
大大方方大車路
tuā-tuā-hong-hong tuā-tshia-lōo
共當做運動埕
kā tòng-tsò ūn-tōng-tiânn
駛咧四界行
sái leh sì-kè kiânn
害著對面來的150cc的機車
hāi tio̍h tuì-bīn lâi ê 150cc ê ki-tshia
車手煞扞袂定
tshia-tshiú suah huānn buē tiānn
為著欲閃彼台電動車
uī-tio̍h beh siám hit tâi tiān-tōng-tshia
煞去挵著水肥車
suah khì lòng-tio̍h tsuí-puî-tshia
彼个水肥車
hit ê tsuí-puî-tshia
趕緊來煞車
kuánn-kín lâi sat-tshia
猶毋過
iáu-m̄-koh
水肥已經噴出規半車
tsuí-puî í-king phùn tshut kui puànn-tshia
害我坐的計程車
hāi guá tsē ê kè-thîng-tshia
規車煞臭kiâ-kiâ
kui tshia suah tshàu kiâ-kiâ
好佳哉好佳哉
hó-ka-tsài hó-ka-tsài
後面綴著一台消防車
āu-bīn tuè tio̍h tsi̍t-tâi siau-hông-tshia
趕緊濺水來共我洗車
kuánn-kín tsuānn-tsuí lâi kā guá sé tshia
洗好車
sé-hó tshia…
洗好車才閣去聽著
sé-hó tshia tsiah-koh khì thiann-tio̍h
彼號觱觱聲
hit-lō pi-pi-siann
車輛全部才閣起行
tshia-lióng tsuân-pōo tsiah-koh khí-kiânn
唉唷猶毋過想著會驚
aih-iooh, iáu-m̄-koh siūnn-tio̍h ē kiann
所以講我欲拜託囡仔兄
sóo-í kóng guá beh pài-thok gín-á-hiann
交通規則恁著聽
kau-thong kui-tsik lín tio̍h thiann
恁若發生事故
lín nā huat-sing sū-kòo
爸母的心是真痛疼
pē-bú ê sim sī tsin thàng-thiànn
車路毋通當做運動埕
tshia-lōo m̄-thang tòng-tsò ūn-tōng-tiânn
才袂發生人命
tsiah buē huat-sing lâng-miā
↑↑(口白)—(口白)—(口白)↑↑
觱觱仔聲歕一聲
pi-pi-á-siann pûn tsi̍t-siann
車輛又起行
tshia-lióng iū khí-kiânn
囡仔人發生事故
gín-á-lâng huat-sing sū-kòo
爸母心痛疼
pē-bú sim thàng-thiànn
大車路千萬毋通
tuā-tshia-lōo tshian-bān m̄-thang
當做運動埕
tòng-tsuè ūn-tōng-tiânn
聽歌的先生小姐
thiann-kua ê sian-sinn sió-tsiá
恁若欲坐車
lín nā beh tsē tshia
請恁要求司機大兄
tshiánn lín iau-kiû su-ki tuā-hiann
車掌小姐
tshia-tsiáng sió-tsiá
著遵守交通規則
tio̍h tsun-siú kau-thong kui-tsik
毋通超載佮超車
m̄-thang tshiau-tsài kah tshiau-tshia
也通來保全
iā thang lâi pó-tsuân
自己寶貴的性命
tsū-kí pó-kuì ê sìnn-miā
