喝玲瑯賣雜細
https://www.youtube.com/watch?v=4mj–ihR28k&fbclid=IwAR3tT9kwLDev4KN3PkSx1R234jYHxpqQJP4rTCaxn_yJZBS9kP7ntMikU88
《喝玲瑯賣雜細》Huah-lin-long Bē Tsa̍p-sè
郭大誠 Kueh Tāi-sîng
——————————————
玲玲瑯瑯 / lin-lin-long-long
玲玲瑯瑯 / lin-lin-long-long
喝玲瑯 / huah-lin-long
賣雜細 / buē tsa̍p-sè
街頭巷尾四界踅 / ke-thâu hāng-bé sì-kè se̍h
今仔日對遮過 / kia̋nn-ji̍t tuì tsia kè
看恁愛啥貨 / khuànn lín ài siánn-hè
請恁免講價 / tshiánn lín bián kóng-kè
絕對無問題 / tsua̍t-tuì bô būn-tê
無論是胭脂水粉 / bô-lūn sī ian-tsi tsuí-hún
膨粉佮膨紗 / phòng-hún kah phòng-se
阮就是喝玲瑯 / gún tsiō-sī huah-lin-long
賣雜細 / buē tsa̍p-sè
↓↓(口白)—(口白)—(口白)↓↓
來喔 / lâi–ooh
欸~來看喝玲瑯的 / eh~ lâi khuànn huah-lin-long–ê
咧賣雜細 / teh bē tsa̍p-sè
毋是欲賣恁搖鼓 / m̄-sī beh lín iô-kóo
佮賣鼎摖 / kah bē tiánn-tshè
是欲賣化妝的百貨 / sī beh bē huà-tsong ê pah-hè
今仔日 / kin-á-ji̍t
全部欲俗俗仔賣 / tsuân-pōo beh sio̍k-sio̍k-á bē
豬肉欲共當做鹹菜價 / ti-bah beh kā tòng-tsuè kiâm-tshài kè
恁若欠用才緊來提 / lín nā khiàm-īng tsiah kín lâi the̍h
看! / khuànn!
倚來看 / uá lâi khuànn
俗對半 / sio̍k tuì-puànn
毋是我咧愛彈 / m̄-sī guá leh ài tuānn
我的水粉提去抹 / guá ê tsuí-hún the̍h-khì buah
抹抹咧真好看 / buah-buah–eh tsin hó-khuànn
妝妝咧敢若阿旦 / tsng-tsng–eh kánn-ná a-tuànn
一盒才賣恁兩箍半 / tsi̍t-a̍p tsiah bē lín nn̄g-khoo-puànn
我袂歕雞胿啦 / guá buē pûn-ke-kui–lah
一个阿婆仔今年八十幾 / tsi̍t-ê a-pô-á kin-nî peh-tsa̍p-kuí
抹著我的膨粉佮水粉 / buah-tio̍h guá ê phòng-hún kah tsuí-hún
閣會老媠仔老媠 / koh ē lāu-suí-á lāu-suí
來喔 / lâi–ooh
欸~這馬閣來 / eh~ tsit-má koh lâi
換胭脂 / uānn ian-tsi
胭脂若欲買 / ian-tsi nā beh bé
你著愛揀 / lí to̍h-ài kíng
彼號好氣味的 / hit-lō hó khì-bī–ê
啊若是欲抹 / ah nā sī beh buah
你著愛抹喙邊 / lí to̍h-ài buah tshuì-pinn
愛人仔鼻著 / ài-jîn-á phīnn–tio̍h
毋才會心綿綿 / m̄-tsiah ē sim mî-mî
啊小姐你毋通假? / ah sió-tsiá lí m̄-thang ké-gâu
胭脂你若提去抹咧鼻頭 / ian-tsi lí nā the̍h-khì buah leh tih phīnn-thâu
啊拄好親像圓山仔 / ah tú-hó tshin-tshiūnn Înn-suann-á
彼隻紅鼻猴 / hit-tsiah âng-phīnn-kâu
欸~一枝偌濟 / eh~ tsi̍t-ki guā-tsuē
凊彩 / tshìn-tshái
兩箍四 / nn̄g-khoo sì
慢且是 / bān-tshiánn-sī
恁若欲共我買一枝 / lín nā beh kā guá bé tsi̍t-ki
我另外欲閣送恁一枝 / guá līng-guā beh koh sàng lín tsi̍t-ki
予恁轉去分厝邊 / hōo lín tńg-khì pun tshù-pinn
啊若有人欲挃 / ah nā ū-lâng beh ti̍h
你就趁這馬緊講起 / lí tō thàn tsit-má kín kóng-khí
抑若無予我收起來 / ia̍h-nā-bô, hōo guá siu–khí-lâi
才欲挃乎 / tsiah beh ti̍h–honnh
著愛閣重講錢 / tio̍h-ài koh tîng kóng-tsînn
有人欲無? / ū-lâng beh bô?
唅!啥物? / hannh! siánn-mih!?
逐家煞靜靜 / ta̍k-ke suah tsīng-tsīng
按呢大概 / án-ne tāi-khài
逐家敢是無合用 / ta̍k-ke kánn sī bô ha̍h-īng
人客啊 / lâng-kheh–ah!
恁毋通俗米嫌臭殕 / lín m̄-thang sio̍k bí hiâm tshàu-phú
俗番薯嫌曲痀 / sio̍k han-tsî hiâm khiau-ku
真珠共我看做鳥鼠仔屎 / tsin-tsu kā guá khuànn-tsò niáu-tshí-á-sái
我賣恁俗 / guá bē lín sio̍k
恁煞共我嫌䆀 / lín suah kā guá hiâm bái
嗒！抑無這馬來換一領 / tah! ia̍h-bô, tsit-má lâi huah
美國製的四十八人份的蠓罩 / bí-kok tsè ê sì-tsa̍p-peh lâng-hūn ê báng-tà
會用得圍灶跤 / ē-īng-tit uî tsàu-kha
也會用得圍籬笆 / iā ē-īng-tit uî lî-pa
嘛會用得做魚網仔
mā ē-īng-tit tsò hî-bāng-á
提去大海拋 / the̍h-khì tuā-hái pha
一領才賣恁一十八 / tsi̍t-niá tsiah bē lín yīshípǎ
閣來喔 / koh lâi–ooh
欸 這馬欲來喝齒膏 / eh tsit-má beh lâi huah khí-ko
恁毋通看做這號藥膏 / lín m̄-thang khuànn-tsuè tsit-lō io̍h-ko
提轉去烏白挲 / the̍h tńg-khì oo-pe̍h so
挲一下久變癩 / so tsi̍t-ē kú, piàn thái-ko
煞予人講你去歪哥 / suah hōo-lâng kóng lí khì uai-ko
啊彼陣你著真囉嗦 / ah hit-tsūn lí to̍h tsin lo-so
來來來 / lâi, lâi, lâi
抑無來喝一塊雪文 / ia̍h-bô lâi huah tsi̍t-tè sap-bûn
這塊雪文 / tsit tè sap-bûn
芳摃摃 / phang kòng-kòng
閣摃摃芳 / koh kòng-kòng phang
鼻一擺就芳七工 / phīnn tsi̍t-pái tō phang tshit-kang
初一提來洗身軀 / tshe-it the̍h-lâi sé-sin-khu
十五猶佇咧輕鬆 / tsa̍p-gōo iáu tī-leh khin-sang
囥咧三年過五冬 / khǹg-leh sann-nî kè gōo-tang
嘛免驚仔會蛀空
mā bián-kiann-á tsiù-khang
嘛免驚仔會生蟲
mā bián-kiann-á ē sinn-thâng
來喔 半賣半相送 / lâi–ooh puànn bē puànn sio-sàng
一項一項來共拚 / tsi̍t-hāng tsi̍t-hāng lâi kā piànn
敢若親像關公走麥城 / kánn-ná tshinn-tshiūnn Kuan-kong tsáu Be̍h-siânn
便喝便輸贏 / piān huah piān su-iânn
恁若欲愛 / lín nā beh ài
才喝聲 / tsiah huah-siann
緊來喔 / kín lâi–ooh
↑↑(口白)—(口白)—(口白)↑↑
玲玲瑯瑯 / lin-lin-long-long
玲玲瑯瑯 / lin-lin-long-long
喝玲瑯 / huah-lin-long
賣雜細 / buē tsa̍p-sè
街頭巷尾四界踅 / ke-thâu hāng-bé sì-kè se̍h
今仔日對遮過 / kia̋nn-ji̍t tuì tsia kè
看恁愛啥貨 / khuànn lín ài siánn-hè
請恁免講價 / tshiánn lín bián kóng-kè
絕對無問題 / tsua̍t-tuì bô būn-tê
無論是胭脂水粉 / bô-lūn sī ian-tsi tsuí-hún
膨粉佮膨紗 / phòng-hún kah phòng-se
阮就是喝玲瑯 / gún tsiō-sī huah-lin-long
賣雜細 / buē tsa̍p-sè
