雲林會出頭天
《雲林會出頭天》Hûn-lîm Ē Tshut-thâu-thinn
張凰玉 Tiunn Hông-gio̍k
——————————————
一隻白翎鷥
tsi̍t tsiah pe̍h-līng-si
飛過田岸邊
pue kuè tshân-huānn pinn
稻穗飽閣滇
tiū-suī pá koh tīnn
豐收咱好過年
hong-siu lán hó kuè-nî
一隻白翎鷥
tsi̍t tsiah pe̍h-līng-si
飛過溪仔墘
pue kuè khe-á-kînn
濁水溪的水
Lô-tsuí-khe ê tsuí
流過啊千百年
lâu kuè–ah tshian-pah nî
感謝你閣感謝伊
kám-siā lí koh kám-siā i
感謝咱的好啊厝邊
kám-siā lán ê hó–ah tshù-pinn
草青青咱心啊歡喜
tsháu tshinn-tshinn lán sim–ah huann-hí
樸實的雲林會出頭天
phoh-si̍t ê Hûn-lîm ē tshut-thâu-thinn
一群白翎鷥
tsi̍t kûn pe̍h-līng-si
飛過咱厝邊
pue kuè lán tshù-pinn
農村好景緻
lông-tshun hó kíng-tì
流傳啊千百年
liû-thuân–ah tshian-pah nî
草笠仔遮日頭
tsháu-le̍h-á jia ji̍t-thâu
肩胛咱揹啊鋤頭
king-kah lán phāinn–ah tî-thâu
田園去巡田水
tshân-hn̂g khì sûn tshân-tsuí
牽牛嘛去食草
khan gû–mah khì tsia̍h tsháu
稻草閣做眠床
tiū-tsháu koh tsuè bîn-tshn̂g
一暝咱到天光
tsi̍t-mî lán kàu thinn-kng
日頭嘛照田園
ji̍t-thâu–mah tsiò tshân-hn̂g
牽成咱好囝孫
khan-sîng lán hó kiánn-sun
車鼓陣咱迎神明
tshia-kóo-tīn lán ngiâ sîn-bîng
北港的媽祖閣上啊蓋興
Pak-káng ê Má-tsóo koh siōng–ah kài hing
聽故事咱想啊早前
thiann kòo-sū lán siūnn–ah tsá-tsîng
雲林的子弟欲行向前
Hûn-lîm ê tsú-tē beh kiânn hiòng-tsîng
拳頭閣出西螺
kûn-thâu koh tshut Sai-lê
大俠伊佇啊虎尾
tāi-kiap i tī–ah Hóo-bué
行過啊濁水溪
kiânn kuè–ah Lô-tsuí-khe
夕陽嘛映臺西
si̍k-iông–mah ìng Tâi-se
行過啊濁水溪
kiânn kuè–ah Lô-tsuí-khe
故鄉嘛是咱的
kòo-hiong–mah sī lán–ê
白翎鷥捙畚箕
pe̍h-līng-si tshia-pùn-ki
捙到溪仔墘
tshia kàu khe-á-kînn
跋一倒
pua̍h tsi̍t-tó
抾著一仙錢
khioh-tio̍h tsi̍t sian tsînn
