採茶女
《採茶女》Tshái-tê-lú
張淑美Tiunn Siok-bí
——————————————
挽茶葉
bán tê-hio̍h
顧三頓
kòo-sann-tǹg
透早著出門
thàu-tsá tio̍h tshut-mn̂g
毋通看輕阿娘無梳妝
m̄-thang khuànn-khin a-niû bô sue-tsng
希望有情阿哥趕緊來拍算
hi-bāng ū-tsîng a-ko kuánn-kín lâi phah-sǹg
挽茶阿娘青春無偌長
bán-tê a-niû tshing-tshun bô guā tn̂g
春天風
tshun-thinn hong
吹微微
tshue bî-bî
吹著茶葉青
tshue tio̍h tê-hio̍h tshinn
有心?到阿娘身軀邊
ū-sim khueh kàu a-niû sin-khu-pinn
毋知有情阿哥是欲怎主意
m̄-tsai ū-tsîng a-ko sī beh tsuánn tsú-ì
挽茶阿娘空等無了時
bán-tê a-niû khang-tán bô-liáu-sî
挽茶葉
bán tê-hio̍h
挽無葉
bán bô hio̍h
挽甲頭犁犁
bán kah thâu luê-luê
鹹酸苦澀阿娘無問題
kiâm-sng khóo-siap a-niû bô būn-tuê
若是有情阿哥欲講著坦白
nā-sī ū-tsîng a-ko beh kóng tio̍h thán-pi̍k
挽茶阿娘當然是欲嫁
bán-tê a-niû tong-jiân sī beh kè
日頭燒
ji̍t-thâu sio
潑水滴
phuah tsuí-tih
忍耐過日子
jím-nāi kè ji̍t-tsí
毋通棄嫌阿娘重金錢
m̄-thang khì-hiâm a-niû tiōng kim-tsînn
希望有情阿哥應該著表示
hi-bāng ū-tsîng a-ko ìng-kai tio̍h piáu-sī
挽茶阿娘猶原重情義
bán-tê a-niû iu-guân tiōng tsîng-gī
