幸福魔法師
《幸福魔法師》Hīng-hok Môo-huat-su
浩角翔起
——————————————
人生難免有閃失
jîn-sing lân-bián ū siám-sit
兩手若空空
nn̄g-tshiú nā khang-khang
你講這叫空手道
lí kóng tse kiò khang-tshiú-tō
上好予咱練功夫
siōng-hó hōo lán liān kang-hu
人生難免欠淡薄
jîn-sing lân-bián khiàm tām-po̍h
別人若有困難
pa̍t-lâng nā ū khùn-lân
你講一定愛鬥相共
lí kóng it-tīng ài tàu-sann-kāng
因為咱有好功夫
in-uī lán ū hó kang-hu
厝外若落大雨
tshù-guā nā lo̍h tuā-hōo
厝內就澹漉漉
tshù-lāi tiō tâm-lok-lok
你講叮叮噹噹若拍鼓
lí kóng tin-tin-tong-tong ná phah-kóo
合音唱歌上拄好
ha̍p-im tshiùnn-kua siōng tú-hó
別人怨嘆袂滿足
pa̍t-lâng uàn-thàn buē buán-tsiok
是戇人自揣煩惱
sī gōng-lâng tsū-tshuē huân-ló
你講一定愛有快樂
lí kóng it-tīng ài ū khuài-lo̍k
日子才會快活幸福
ji̍t-tsí tsiah-ē khuìnn-ua̍h hīng-hok
辛苦
sin-khóo
你攏當做幸福咧享受
lí lóng tòng-tsuè hīng-hok teh hiáng-siū
你講有一身空手道
lí kóng ū tsi̍t-sin khang-tshiú-tō
就有機會展功夫
tiō ū ki-huē tián kang-hu
無到有
bô kàu ū
萬事辦法咱家己想
bān-sū pān-huat lán ka-kī siūnn
咱攏是幸福魔法師
lán lóng-sī hīng-hok môo-huat-su
變變變
piàn piàn piàn
變連變連變變
piàn–liân piàn–liân piàn piàn
酸的你會變甜
sng–ê lí ē piàn tinn
苦的你會變無去
khóo–ê lí ē piàn bô–khì
拄著不如意
tú-tio̍h put-jû ì
你會變趣味
lí ē piàn tshù-bī
變變變
piàn piàn piàn
變連變連變變
piàn–liân piàn–liân piàn piàn
一杯米變出一鼎飯
tsi̍t-pue bí piàn tshut tsi̍t-tiánn pn̄g
這你專門
tse lí tsuan-bûn
變變變
piàn piàn piàn
變連變連變變
piàn–liân piàn–liân piàn piàn
咱攏是幸福魔法師
lán lóng-sī hīng-hok môo-huat-su
