城市之夜
《城市之夜》Siânn-tshī tsi Iā (1935年)
純純 Sûn-sûn (劉清香Lau Tshing-hiong)
——————————————
胭脂水粉嬌裝樣
ian-tsi tsuí-hún kiau tsong-iūnn
踏在跳舞場
ta̍h tsāi thiàu-bú-tiûnn
面上歡喜咧風流
bīn tshiūnn huann-hí teh hong-liû
心內藏憂愁
sim-lāi tsông iu-tshiû
藏憂愁
tsông iu-tshiû
啥人會曉替阮想
siánn-lâng ē-hiáu thè gún siūnn
賣去身軀現犧牲
buē khì sin-khu hiān hi-sing
若毋厝內窮
nā m̄, tshù-lāi kîng
生活戰線亂心性
sing-ua̍h tsiàn-suànn luān sim-sìng
貧女極不幸
pîn-lú ki̍k put-hīng
極不幸
ki̍k put-hīng
真是可恨的世情
tsin sī khó-hūn ê sè-tsîng
金錢魔鬼引阮來
kim-tsînn môo-kuí ín gún lâi
才著留目屎
tsiah tio̍h lâu ba̍k-sái
這款事情若早知
tsit khuán sū-tsîng nā tsá tsai
關門在庄內
kuinn-mn̂g tsāi tsng-lāi
在庄內
tsāi tsng-lāi
免入城市咧悲哀
bián ji̍p siânn-tshī teh pi-ai
