手中線
《手中線》Tshiú-tiong Suànn
袁小迪Uân Sió-ti̍k
——————————————
看著阿母的背影
khuànn-tio̍h a-bú ê puē-iánn
彎腰替人咧補衫
uainn-io thè lâng teh póo-sann
一針一線
tsi̍t-tsiam tsi̍t-suànn
攏是為著白米換
lóng-sī uī-tio̍h pe̍h-bí uānn
歲月無情咧陪伴
suè-gua̍t bô-tsîng teh puê-phuānn
阮是酸酸仔的心疼
gún sī sng-sng-á ê sim thiànn
感謝你
kám-siā lí
對阮永遠的牽掛
tuì gún íng-uán ê khian-kuà
阿母仔的手中線
a-bú–á ê tshiú-tiong suànn
毋驚艱苦將阮晟
m̄-kiann kan-khóo tsiong gún tshiânn
看伊滿面的痕跡
khuànn i muá-bīn ê hûn-jiah
針針鑿入阮心肝
tsiam-tsiam tsha̍k ji̍p gún sim-kuann
阿母仔的手中線
a-bú–á ê tshiú-tiong suànn
攏是疼囝的心情
lóng-sī thiànn-kiánn ê sim-tsiânn
予回頭的浪子啊
hōo huê-thâu ê lōng-tsú–ah
緊靠岸
kín khò-huānn
