看破的愛
《看破的愛》Khuànn-phuà ê Ài
紀露霞 Kí Lōo-hâ
——————————————
想起這个愛
siūnn-khí tsit-ê ài
是悲慘的愛
sī pi-tshám ê ài
茫茫渺渺消失的愛
bông-bông biáu-biáu siau-sit ê ài
啊~淒涼的蒼白的月
ah~ tshe-liâng ê tshong-pe̍h ê ge̍h
靜靜倚在窗門邊
tshīng-tshīng uá tsāi thang-mn̂g pinn
難受痛疼心內憂
lân-siū thàng-thiànn sim-lāi iu
自嘆恨吐大氣
tsū thàn hūn thóo-tuā-khuì
凝看無情天
gîng-khuànn bô-tsîng thinn
現時來啼哭
hiān-sî lâi thî-khàu
也是無路用
iā-sī bô-lōo-īng
只好目屎流濕胸前
tsí-hó ba̍k-sái lâu sip hing-tsîng
啊~淒涼的蒼白的月
ah~ tshe-liâng ê tshong-pe̍h ê ge̍h
悲傷也著來看破
pi-siong iā tio̍h lâi khuànn-phuà
痴心痴情也無用
tshi-sim tshi-tsîng iā bô-īng
心愛的你一人
sim-ài–ê lí tsi̍t-lâng
是無緣的人
sī bô-iân ê lâng
比起做眠夢
pí-khí tsuè bîn-bāng
更淡薄的愛
kìng tām-po̍h ê ài
茫茫渺渺消失的愛
bông-bông biáu-biáu siau-sit ê ài
啊~淒涼的蒼白的月
ah~ tshe-liâng ê tshong-pe̍h ê ge̍h
抱著悲慘的懷念
phō tio̍h pi-tshám ê huâi-liām
看破世情轉鄉里
khuànn-phuà sè-tsîng tńg hiunn-lí
可愛的你一人
khó-ài–ê lí tsi̍t-lâng
從此再會啦
tsiông-tshú tsài-huē–lah
