慈母淚痕
《慈母淚痕》Tsû-bió Luī-hûn
紀露霞 Kí Lōo-hâ
——————————————
為著欲揣阮囝兒
uī-tio̍h beh tshē gún kiánn-jî
離開著鄉里
lī-khui tio̍h hiunn-lí
無嫌路途遠拄天
bô hiâm lōo-tôo hn̄g tú thinn
無惜老年紀
bô sioh lāu nî-kí
哪知行到
ná tsai kiânn kàu
臺北街市
Tâi-pak kue-tshī
看著一時暗驚疑
khuànn tio̍h tsi̍t-sî àm kiann-gî
到底你是踮在佗位
tàu-tué lí sī tiàm-tsāi tó-uī
叫阮欲怎揣你
kiò gún beh tsánn tshē lí
因為伊一時放蕩
in-uī i tsi̍t-sî hòng-tōng
非非離鄉里
hui-hui lī hiunn-lí
害阮暝日思念伊
hāi gún mî-ji̍t su-liām i
探聽伊住址
thàm-thiann i tsū-tsí
有人講起
ū-lâng kóng-khí
伊在臺北
i tsāi Tâi-pak
所以拚命來揣伊
sóo-í piànn-miā lâi tshē i
到底你是踮在佗位
tàu-tué lí sī tiàm-tsāi tó-uī
叫阮欲怎揣你
kiò gún beh tsánn tshē lí
為著欲揣阮囝兒
uī-tio̍h beh tshē gún kiánn-jî
勞苦日連暝
lô-khóo ji̍t liân mî
已經揣伊規半年
í-king tshē i kui puànn-nî
全然袂得見
tsuân-jiân buē-tit kìnn
人馬遮濟
jîn-má tsiah tsuē
地頭生疏
tuē-thâu tshinn-soo
想著心酸目屎滴
siūnn tio̍h sim-sng ba̍k-sái tih
到底你是踮在佗位
tàu-tué lí sī tiàm-tsāi tó-uī
叫阮欲怎揣你
kiò gún beh tsánn tshē lí
