熱戀之夜

《熱戀之夜》Jia̍t-luân tsi Iā
洪一峰Âng It-hong
——————————————
↓↓—(口白)—↓↓
你我來行出酒場
lí guá lâi kiânn tshut tsiú-tiûnn
是靠著燒酒的力氣
sī khò-tio̍h sio-tsiú ê la̍t-khì
抑是沿路罩著雺霧佇咧
ia̍h-sī iân-lōo tà tio̍h bông-bū tī-leh
毋知怎樣
m̄-tsai tsuánn-iūnn
我滿腹的情火
guá muá-pak ê tsîng-hué
已經燒盡了一切
í-king sio tsīn liáu it-tshè

忍不住愛慕的心情
jím put-tsū ài-bōo ê sim-tsîng
禁不住情火的要求
kìm put-tsū tsîng-hué ê iau-kiû
雖然是行到
sui-jiân sī kiânn kàu
應該咱愛分開的所在
ìng-kai lán ài hun-khui ê sóo-tsāi
但是我毋願佮你離開
tān-sī guá m̄-guān kah lí lī-khui
我總是放袂開著你
guá tsóng–sī pàng bē khui tio̍h lí
放袂開著你
pàng bē khui tio̍h lí
↑↑—(口白)—↑↑

毋管你歡喜
m̄-kuán lí huann-hí
抑是你傷悲
ia̍h-sī lí siong-pi
滿腹熱情我總是
muá-pak jia̍t-tsîng guá tsóng–sī
愛對你表示
ài tuì lí piáu-sī
櫻桃喙脣的甘甜
ing-thô tshuì-tûn ê kam-tinn
由我抱著你
iû guá phō tio̍h lí
配合雺霧罩四邊
phuè-ha̍p bông-bū tà sì-pinn
啊~是我初次
ah~ sī guá tshoo-tshù
熱戀的深更
jia̍t-luân ê tshim-kinn

無來袂記你
bô lâi buē-kì lí
彼暝到現時
hit mî kàu hiān-sî
可愛喙脣豔芳味
khó-ài tshuì-tûn iām-phang bī
戀戀在身邊
luân-luân tsāi sin-pinn
無疑你來離開去
bô-gî lí lâi lī-khui–khì
恬恬無講起
tiām-tiām bô kóng-khí
留我暝日心空虛
lâu guá mî-ji̍t sim khang-hi
啊~今宵罩雺
ah~ kim-siau tà-bông
宛然像彼暝
uán-jiân tshiūnn hit mî

↓↓—(口白)—↓↓
我看你流目屎
guá khuànn lí lâu ba̍k-sái
一時真著急
tsi̍t-sî tsin tio̍h-kip
隨時對你抱歉
suî-sî tuì lí phāu-khiàm
你干焦搖頭
lí kan-na iô-thâu
對我笑笑
tuì guá tshiò-tshiò
但是但是
tān-sī tān-sī
你哪毋坦白
lí ná m̄ thán-pi̍k
來表明著你心內的
lâi piáu-bîng tio̍h lí sim-lāi ê
實情佮實意
si̍t-tsîng kah si̍t-ì
↑↑—(口白)—↑↑

暝暝思慕你
mî-mî su-bōo lí
悲傷在路邊
pi-siong tsāi lōo-pinn
欣慕酒場燒酒味
him-bōo tsiú-tiûnn sio-tsiú bī
勇勇行入去
ióng-ióng kiânn–ji̍p-khì
雖然啉到深更時
sui-jiân lim kàu tshim-kinn sî
規身全麻痺
kui-sin tsuân bâ-pì
猶原思念彼當時
iu-guân su-liām hit-tang-sî
啊~一生初次熱戀的深更
ah~ it-sing tshoo-tshù jia̍t-luân ê tshim-kinn