霧夜長相思

《霧夜長相思》Bū-iā Tiông-siunn-si
洪一峰Âng It-hong
——————————————
↓↓—(口白)—↓↓
罩雺的暗暝
tà-bông ê àm-mî
彼个氣氛確實引人
hit ē khì-hun khak-si̍t ín jîn
生出無限的感傷
sing-tshut bô-hān ê kám-siong
孤單行來橋頂散步
koo-tuann kiânn lâi kiô-tíng sàn-pōo
看見遠遠茫茫的燈影
khuànn-kìnn hn̄g-hn̄g bâng-bâng ê ting-iánn
就來想起
tsiū lâi siūnn-khí
佮初戀彼个人欲離開
kah tshoo-luân hit ē lâng beh lī-khui
彼暝的情景
hit mî ê tsîng-kíng
唉!一切在茫茫雺霧中
aih! it-tshè tsāi bâng-bâng bông-bū tiong
經過去
king-kè–khì
心內只有者
sim-lāi tsí-ū–tsiá
就是綿綿不斷的
tsiū-sī mî-mî put-tuān ê
長相思而已啦！
tiông-siunn-si jî-í–lah!
↑↑—(口白)—↑↑

夜夜心內思慕
iā-iā sim-lāi su-bōo
彼暝的伴侶
hit mî ê phuānn-lī
散步黃昏橋邊
sàn-pōo hông-hun kiô-pinn
自慰心哀悲
tsū-uì sim ai-pi
看見今宵的
khuànn-kìnn kim-siau ê
雺霧罩街市
bông-bū tà kue-tshī
燈影茫茫
ting-iánn bâng-bâng
散漫在天邊
sàn-bān tsāi thinn-pinn
若親像離開彼暝
ná-tshin-tshiūnn lī-khui hit mî
引阮珠淚滴
ín gún tsu-luī tih
到底何時才會放開
tàu-tué hô-sî tsiah ē pàng–khui
綿綿長相思
mî-mî tiông-siunn-si

微微春風吹送
bî-bî tshun-hong tshe-sàng
你我的身邊
lí guá ê sin-pinn
踮在深更山埔
tiàm-tsāi tshim-kinn suann-poo
情話真纏綿
tsîng-uē tsin tînn-mî
看見天上的
khuànn kìnn thian-siōng ê
月色光青青
ge̍h-sik kng tshinn-tshinn
天星粒粒
thinn-tshinn lia̍p-lia̍p
閃爍伴著伊
siám-sih phuānn tio̍h i
彼一暝分開彼時
hit tsi̍t-mî hun-khui hit-sî
對阮來提議
tuì gún lâi thê-gī
叫阮著來對伊看破
kiò gún tio̍h lâi tuì i khuànn-phuà
聲聲斷腸詩
siann-siann tuān-tn̂g-si

想起一生的
siūnn-khí it-sing ê
所寄望前程
sóo kì-bāng tsiân-tîng
一時戀戀
it-sî luân-luân
為伊心袂清
uī i sim buē tshing
應該是著愛怎樣
ìng-kai sī tio̍h-ài tsuánn-iūnn
想也袂分明
siūnn iā buē hun-bîng
盈暗又是無情夜霧
îng-àm iū sī bô-tsîng iā-bū
茫茫包夜霧
bâng-bâng pau iā-bū