烏面
《烏面》Oo-bīn
施文彬 Si Bûn-pin
——————————————
古早古早
kóo-tsá kóo-tsá
有人講綠島
ū-lâng kóng Li̍k-tó
親像一隻船
tshin-tshiūnn tsi̍t-tsiah tsûn
搖來搖去
iô-lâi iô-khì
踮茫茫的海中
tiàm bâng-bâng ê hái-tiong
走揣伊的命運
tsáu-tshuē i ê miā-ūn
青色的海水
tshinn-sik ê hái-tsuí
白色的浮雲
pe̍h-sik ê phû-hûn
紅色的黃昏
âng-sik ê hông-hun
就親像一張
tiō tshin-tshiūnn tsi̍t-tiunn
彩色的相片
tshái-sik ê siòng-phìnn
記錄著青春
kì-lo̍k tio̍h tshing-tshun
(RAP)—–↓
講著過去
kóng-tio̍h kuè-khì
我的面就烏一爿
guá ê bīn tiō oo tsi̍t-pîng
阮兜踮佇咧台東綠島
gún-tau tiàm tī-leh Tâi-tang Li̍k-tó
監獄的頭前
kann-ga̍k ê thâu-tsîng
監獄的門口有徛衛兵
kann-ga̍k ê mn̂g-kháu ū khiā-uē-ping
監獄的頂面有機關銃
kann-ga̍k ê tíng-bīn ū ki-kuan-tshìng
監獄的內底關的人物
kann-ga̍k ê lāi-té kuainn ê jîn-bu̍t
聽著你會跤尾冷
thiann tio̍h lí ē kha-bué líng
有史豔文有藏鏡人
ū Sú Iām-bûn ū Tsông-kiànn-jîn
有怪老子閣有恨世生
ū Kuài-nóo-tsú koh ū Hūn-sè-sing
凊凊彩彩叫一个出來
tshìn-tshìn-tshái-tshái kiò tsi̍t-ê tshut-lâi
bá-kuh攏有夠?
bá-kuh lóng ū-kàu tīng
講著我出世
kóng tio̍h guá tshut-sì
阮爸仔面就烏一稜
gún pa–á bīn tiō oo tsi̍t-lîng
仙的有講
sian–ê ū kóng
彼工拄好
hit kang tú-hó
三太子欲上天庭
Sam-thài-tsú beh tshiūnn thian-tîng
半暝來掖種
puànn-mî lâi iā-tsíng
明年來收成
mê-nî lâi siu-sîng
保證是一尾龍
pó-tsìng sī tsi̍t-bué lîng
結果毋知這是啥情形
kiat-kó m̄-tsai tse sī siánn tsîng-hîng
哪會監獄內底吵袂停
ná ē kann-ga̍k lāi-té tshá buē-thîng
雄雄火化去
hiông-hiông hué hua–khì
四界蓬蓬坱
sì-kè phōng-phōng ing
有人挵破監獄的路燈
ū-lâng lòng-phuà kann-ga̍k ê lōo-ting
阮爸仔哀一聲哭枵害囉
gún pa–á ai tsi̍t-siann: khàu-iau, hāi–looh
包公落凡塵
Pau-kong lo̍h huân-tîn
(RAP)—–↑
古早古早
kóo-tsá kóo-tsá
有人講綠島
ū-lâng kóng Li̍k-tó
親像一首歌
tshin-tshiūnn tsi̍t-siú kua
唸來唸去
liām lâi liām khì
一段閣一段
tsi̍t-tuānn koh tsi̍t-tuānn
故事攏唱袂煞
kòo-sū lóng tshiùnn buē suah
白色的海湧
pe̍h-sik ê hái-íng
綠色的田園
li̍k-sik ê tshân-hn̂g
金色的海岸
kim-sik ê hái-huānn
炎炎的日頭
iām-iām ê ji̍t-thâu
親像咧曝乾
tshin-tshiūnn leh pha̍k-kuann
恁爸有夠熱
lín-pē ū-kàu jua̍h
(RAP)—–↓
自從出世
tsū-tsiông tshut-sì
我的面就烏一橛
guá ê bīn tiō oo tsi̍t-kue̍h
所以鄉親父老兄弟姊妹
sóo-í hiong-tshin hū-ló hiann-tī-tsí-muē
叫我是烏面的
kiò guá sī oo-bīn–ê
我是烏牢底
guá sī oo tiâu té
毋是烏無洗
m̄-sī oo bô sé
我是烏甲真澈底
guá sī oo kah tsin thiat-té
我是跤短手短
guá sī kha té tshiú té
矮罔矮
é bóng é
我是真正有才藝
guá sī tsin-tsiànn ū tsâi-gē
我是 oh oh oh
guá sī oh oh oh
我是 yeah yeah yeah
guá sī yeah yeah yeah
我是 more than I can say
guá sī more than I can say
我是出世欲來唸歌
guá sī tshut-sì beh lâi liām-kua
出世欲來講話
tshut-sì beh lâi kóng-uē
出世欲來娛樂逐家
tshut-sì beh lâi gôo-lo̍k ta̍k-ke
啊若講著娛樂
ah nā kóng-tio̍h gôo-lo̍k
我的面就烏一半
guá ê bīn tiō oo tsi̍t-puànn
這馬的電視若比古早
tsit-má ê tiān-sī nā pí kóo-tsá
真正是無夠看
tsin-tsiànn sī bô-kàu khuànn
笑話袂止癢
tshiò-uē buē tsí tsiūnn
妹仔無夠辣
muē–á bô-kàu lua̍h
場面閣無夠大
tiûnn-bīn koh bô-kàu tuā
若真正內行
nā tsin-tsiànn lāi-hâng
欲看外場捙拚
beh khuànn guā-tiûnn tshia-piànn
趕緊來揣我
kuánn-kín lâi tshuē guá
樓頂招樓跤
lâu-tíng tsio lâu-kha
阿母招阿爸
a-bú tsio a-pa
許效舜招澎恰恰
Xǔxiàoshùn tsio Pōng-tshiah-tshiah
厝主招厝跤
tshù-tsú tsio tshù-kha
會頭招會跤
huē-thâu tsio huē-kha
豬八戒招李哪吒
Ti-pak-kài tsio Lí-lô-tshia
(RAP)—–↑
古早古早
kóo-tsá kóo-tsá
有一尊神明
ū tsi̍t-tsun sîn-bîng
人稱是烏面媽
jîn tshing sī Oo-bīn-má
烏面祖師公
Oo-bīn Tsóo-su-kong
毋免人請
m̄-bián lâng tshiánn
家己就會來遮
ka-kī tiō ē lâi tsia
烏面張飛
oo-bīn Tiunn-hui
啉著楊桃汁
lim tio̍h iûnn-thô-tsiap
嚨喉攏袂梢聲
nâ-âu lóng buē sau-siann
有任何的活動
ū jīm-hô ê ua̍h-tāng
需要鬥鬧熱
su-iàu tàu-lāu-jia̍t
揣烏面的上出名
tshuē Oo-bīn–ê siōng tshut-miâ
(口白)—–↓
喜慶宴會
hí-khìng iàn-huē
嫁查某囝娶新婦
kè tsa-bóo-kiánn tshuā-sin-pū
老人做生日
lāu-lâng tsò-senn-ji̍t
囡仔做度晬
gín-á tsò tōo-tsè
工場開幕食尾牙
kang-tiûnn khui-bōo tsia̍h bé-gê
恁兜欲鬧熱
lín-tau beh lāu-jia̍t
揣烏面的
tshuē Oo-bīn–ê
就著矣啦
tō tio̍h–ah-lah
感恩唅~
kám-un–hannh~
(口白)—–↑
