慕情的黃昏

《慕情的黃昏》Bōo-tsîng ê Hông-hun
洪一峰Âng It-hong
——————————————
黃昏天紅日頭
hông-hun thinn âng ji̍t-thâu
漸漸落山後
tsiām-tsiām lo̍h suann-āu
怎樣冷風一直透
tsuánn-iūnn líng-hong it-ti̍t thàu
催阮目屎流
tshui gún ba̍k-sái lâu
海洋的勇敢男兒
hái-iûnn ê ióng-kám lâm-jî
無容易隨便吼
bô iông-ī suî-piān háu
阮就是見景傷情
gún tsiū-sī kiàn-kíng siong-tsîng
心情亂操操
sim-tsîng luān-tshau-tshau
思念著彼个人
su-liām tio̍h hit ē lâng
對阮情意厚
tuì gún tsîng-ì kāu

黃昏天金散雲
hông-hun thinn kim suànn-hûn
抱著小山崙
phō tio̍h sió suann-lūn
海面水影帶淚痕
hái-bīn tsuí-iánn tài luī-hûn
引阮心憂悶
ín gún sim iu-būn
遠遠的船隻水螺
hn̄g-hn̄g ê tsûn-tsiah tsuí-lê
在耳邊亂紛紛
tsāi hīnn-pinn luān hun-hun
若親像叫醒著阮
ná-tshin-tshiūnn kiò-tshínn tio̍h gún
想起舊情份
siūnn-khí kū tsîng-hūn
想起著彼个人
siūnn-khí tio̍h hit ē lâng
心性真溫馴
sim-sìng tsin un-sûn

黃昏天帶愁味
hông-hun thinn tài tshiû-bī
暗影拖四邊
àm-iánn thua sì-pinn
波浪唱著慕情詩
pho-lōng tshiùnn tio̍h bōo-tsîng si
伴阮心纏綿
phuānn gún sim tînn-mî
慕情的天星閃爍
bōo-tsîng ê thinn-tshinn siám-sih
安慰著阮稀微
an-uì tio̍h gún hi-bî
到現在更加明白
kàu hiān-tsāi kìng-ka bîng-pi̍k
女性的情意
lú-sìng ê tsîng-ì
希望著彼个人
hi-bāng tio̍h hit ē lâng
毋通心空虛
m̄-thang sim khang-hi