石頭心

《石頭心》Tsio̍h-thâu-sim
阿吉仔 A-kiat–á
——————————————
千年石萬年心
tshian-nî tsio̍h bān-nî sim
被風吹雨水淋
pī hong tshue hōo-tsuí lâm
吹袂振動石頭的影跡
tshue buē tín-tāng tsio̍h-thâu ê iánn-jiah
淋袂澹的石心肝
lâm buē tâm ê tsio̍h sim-kuann

千年針萬年線
tshian-nî tsiam bān-nî suànn
針線若穿相倚
tsiam-suànn nā tshng sio-uá
無法度紩合石頭的必巡
bô-huat-tōo thīnn ha̍p tsio̍h-thâu ê pit-sûn
內底裂開的形影
lāi-té liah–khui ê hîng-iánn

石頭心若有縫
tsio̍h-thâu sim nā ū phāng
拄著溫柔的多情人
tú-tio̍h un-jiû ê to-tsîng-lâng
用千年的無形針
iōng tshian-nî ê bô-hîng tsiam
穿入受傷的石頭縫
tshng ji̍p siū-siong ê tsio̍h-thâu phāng

石頭心若有縫
tsio̍h-thâu sim nā ū phāng
拄著有心的多情人
tú-tio̍h ū-sim ê to-tsîng-lâng
用萬年的無形線
iōng bān-nî ê bô-hîng suànn
破碎的心才紩會峇
phò-tshuì ê sim tsiah thīnn ē bā