臺南的聲是啥
《臺南的聲是啥》Tâi-lâm ê Siann Sī Siánn【南面而歌】
阿雞A-ke
——————————————
敢是今仔日的工課
kám-sī kin-á-ji̍t ê khang-khuè
淡薄仔忝
tām-po̍h-á thiám
感覺今仔日的臺南
kám-kak kin-á-ji̍t ê Tâi-lâm
淡薄仔鹹
tām-po̍h-á kiâm
敢是今仔頭家講話
kám-sī kin-á thâu-ke kóng-uē
淡薄仔薟
tām-po̍h-á hiam
只是今仔嫌家己
tsí-sī kin-á hiâm ka-kī
淡薄仔茫
tām-po̍h-á bâng
逐工佮時間比賽
ta̍k-kang kah sî-kan pí-sài
傱啊傱啊
tsông–ah tsông–ah
來去的車流量佮風聲
lâi-khì ê tshia-liû-liōng kah hong-siann
陪伴拍拚
puê-phuānn phah-piànn
無閒放鬆為著生活
bô-îng pàng-sang uī-tio̍h sing-ua̍h
認真做工
jīn-tsin tsuè-kang
我知影你毋知影
guá tsai-iánn lí m̄ tsai-iánn
其實上忝是做人
kî-si̍t siōng thiám sī tsuè-lâng
試看覓共目睭合起來
tshì-khuànn-māi kā ba̍k-tsiu ha̍p–khí-lâi
你會認真感受
lí ē jīn-tsin kám-siū
聲音佮喘氣
siann-im kah tshuán-khuì
分明用心享受
hun-bîng iōng-sim hiáng-siū
氣味佮慣勢
khì-bī kah kuàn-sì
家己問我敢有
ka-kī mn̄g guá kám ū
漸漸仔佮意
tsiām-tsiām-á kah-ì
這是一門功夫
tse sī tsi̍t-mn̂g kang-hu
調整好心情
tiâu-tsíng hó sim-tsîng
共我講
kā guá kóng
臺南代表啥物聲
Tâi-lâm tāi-piáu siánn-mih siann
啥物聲佇你心內
siánn-mih siann tī lí sim-lāi
是代表啥心情
sī tāi-piáu siánn sim-tsiânn
啥物款的答案
siánn-mih khuán ê tap-àn
是代表啥物款生活
sī tāi-piáu siánn-mih khuán sing-ua̍h
啥物款的你
siánn-mih khuán ê lí
是啥物聲音共你唌
sī siánn-mih siann-im kā lí siânn
代表啥物聲啥物聲
tāi-piáu siánn-mih siann siánn-mih siann
代表啥物心情
tāi-piáu siánn sim-tsiânn
代表啥物生活
tāi-piáu siánn-mih sing-ua̍h
啥物聲音共你唌
siánn-mih siann-im kā lí siânn
區間車往臺南站到矣
khu-kan-tshia óng Tâi-lâm tsām kàu–ah
成功路頂的鴨母寮仔
Sîng-kong-lōo tíng ê ah-bó-liâu-á
逐工暗暝的石磯仔
ta̍k-kang àm-mî ê Tsio̍h-ki-á
新美街的邢王爺
Sin-bí-ke ê Hîng-ông-iâ
有時敢會感覺
ū-sî kám ē kám-kak
這个世界轉了傷緊
tsit-ê sè-kài tńg liáu sionn kín
抑是敢會感覺
ia̍h-sī kám ē kám-kak
這个社會生活過了傷弓
tsit-ê siā-huē sing-ua̍h kuè-liáu sionn king
有時敢會感覺
ū-sî kám ē kám-kak
自己為啥會遐爾仔無閒
tsū-kí uī siánn ē hiah-nī-á bô-îng
我想你必須愛
guá siūnn lí pit-su ài
揣家己快樂的方式
tshuē ka-kī khuài-lo̍k ê hong-sik
來
lâi
試看覓喔
tshì-khuànn-māi–ooh
慢慢咧行
bān-bān teh kiânn
勻勻咧聽
ûn-ûn teh thiann
沓沓咧看
ta̍uh-ta̍uh teh khuànn
聊聊仔
liâu-liâu-á
寬寬仔
khuann-khuann-á
