悲戀的港口

《悲戀的港口》Pi-luân ê Káng-kháu

金飛Kim-hui

——————————————

港口彩燈閃爍

káng-kháu tshái-ting siám-sih

照落暗淡酒吧內

tsiò lo̍h àm-tām tsiú-pa lāi

心愛的彼个姑娘

sim-ài ê hit ê koo-niû

形影猶原在

hîng-iánn iu-guân tsāi

深更的船螺

tshim-kinn ê tsûn-lê

引阮悲哀

ín gún pi-ai

啊~叫阮怎樣來忍耐

ah~ kiò gún tsánn-iūnn lâi jím-nāi

痛苦的心內

thòng-khóo ê sim-lāi

月娘也避在雲內

ge̍h-niû iā pī tsāi hûn-lāi

替阮咧悲哀

thuè gún teh pi-ai

心愛彼个姑娘

sim-ài hit ê koo-niû

予阮每日想袂停

hōo gún muí-ji̍t siūnn buē-thîng

踮船頂彈著吉他

tiàm tsûn-tíng tuânn tio̍h gì-tah

聲音帶悲情

siann-im tài pi-tsîng

枉費阮一片對伊真情

óng-huì gún tsi̍t-phìnn tuì i tsin-tsîng

啊~滿腹苦情

ah~ muá-pak khóo-tsîng

來對著海面訴悲情

lâi tuì tio̍h hái-bīn sòo pi-tsîng

夜風冷

iā-hong líng

吹阮胸前

tshue gún hing-tsîng

珠淚留袂停

tsu-luī lâu buē-thîng

港口彩燈照來

káng-kháu tshái-ting tsiò lâi

心愛姑娘的形影

sim-ài koo-niû ê hîng-iánn

孤一个踮在船頂

koo tsi̍t-ê tiàm-tsāi tsûn-tíng

叫著伊的名

kiò tio̍h i ê miâ

只有是空聽海波浪聲

tsí-ū sī khang thiann hái-pho-lōng siann

啊~傷心珠淚留袂定

ah~ siong-sim tsu-luī lâu buē-tiānn

暗中吼出聲

àm-tiong háu tshut-siann

怨嘆著阮的運命

uàn-thàn tio̍h gún ê ūn-miā

只有孤單影

tsí-ū koo-tuann iánn