阿媽
《阿媽》A-má
邱賢桂Khu Hiân-kuì
——————————————
阿媽的背影
a-má ê puē-iánn
伊無怨天怨地認命
i bô uàn-thinn uàn-tē jīn-miā
漸漸消瘦
tsiām-tsiām siau-sán
變老的形影
piàn lāu ê hîng-iánn
青春過了較濟一半
tshing-tshun kuè-liáu khah tsuē tsi̍t-puànn
阿媽的背影
a-má ê puē-iánn
歲月無情來做伴
suè-gua̍t bô-tsîng lâi tsuè-phuānn
滿面的滄桑痕跡
muá-bīn ê tshong-song hûn-jiah
為阮受盡風寒
uī gún siū-tsīn hong-kuânn
感謝你來將阮疼命命
kám-siā lí lâi tsiong gún thiànn miā-miā
阿媽
a-má
你毋驚辛苦將阮晟
lí m̄-kiann sin-khóo tsiong gún tshiânn
抾人無愛的歹銅舊錫
khioh lâng bô-ài ê pháinn-tâng-kū-siah
予人笑
hōo-lâng tshiò
予人趕
hōo-lâng kuánn
閣愛忍受著病疼的折磨
koh ài jím-siū tio̍h pēnn-thiànn ê tsiat-buâ
阿媽
a-má
阮大漢了才知影
gún tuā-hàn liáu tsiah tsai-iánn
你的偉大親像山
lí ê uí-tāi tshin-tshiūnn suann
我會牽你的手
guá ē khan lí ê tshiú
希望你勇健
hi-bāng lí ióng-kiānn
予阮閣再陪你四界行
hōo gún koh-tsài puê lí sì-kè kiânn
—
我會牽你的手
guá ē khan lí ê tshiú
希望你勇健
hi-bāng lí ióng-kiānn
那行那唱著歌
ná kiânn ná tshiùnn tio̍h kua
予你來聽
hōo lí lâi thiann
