膨紗衫

《膨紗衫》Phòng-se-sann
林淑容Lîm Siok-iông
——————————————
天色漸涼
thinn-sik tsiām liâng
秋風微微寒
tshiu-hong bî-bî kuânn
落葉飄落阮窗外
lo̍h-hio̍h phiau lo̍h gún thang-guā
心內掛念出外的你
sim-lāi kuà-liām tshut-guā ê lí
為你做著一領膨紗衫
uī lí tsuè tio̍h tsi̍t-niá phòng-se-sann

一針一線
tsi̍t-tsiam tsi̍t-suànn
針出阮的情
tsiam tshut gún ê tsîng
一針一線
tsi̍t-tsiam tsi̍t-suànn
攏是愛
lóng-sī ài
希望你保惜這領膨紗衫
hi-bāng lí pó-sioh tsit niá phòng-se-sann
是阮對你的期待關懷
sī gún tuì lí ê kî-thāi kuan-huâi

你為著咱的將來
lí uī-tio̍h lán ê tsiong-lâi
辛苦來拍拚
sin-khóo lâi phah-piànn
我只好恬恬
guá tsí-hó tiām-tiām
甘願忍受著孤單
kam-guān jím-siū tio̍h koo-tuann
無閒的時陣
bô-îng ê sî-tsūn
有伊來做伴
ū i lâi tsuè-phuānn
若是有閒的時陣
nā-sī ū-îng ê sî-tsūn
會記來想著我
ē-kì lâi siūnn-tio̍h guá