露水的愛情

《露水的愛情》Lōo-tsuí ê Ài-tsîng
林峰Lîm Hong
——————————————
自從熟似三禮拜
tsū-tsiông si̍k-sāi sann lé-pài
一直對阮來求愛
it-ti̍t tuì gún lâi kiû-ài
較慘會死也欲愛
khah tshám ē sí iā bueh ài
偏偏求愛半暝來
phian-phian kiû-ài puànn-mî lâi
予阮失主裁
hōo gún sit tsú-tshâi
一夜緣份佯毋知
tsi̍t-iā iân-hūn tìnn m̄-tsai
又閣罵阮家己愛
iū-koh mā gún ka-kī ài
啥人會知假情愛
siánn-lâng ē tsai ké tsîng-ài
露水緣份
lōo-tsuí iân-hūn
天光無存在
thinn-kng bô tsûn-tsāi

想欲看破斷情絲
siūnn-bueh khuànn-phuà tunā tsîng-si
誰知為伊暝日啼
siáng tsai uī i mî-ji̍t thî
甘蜜情義難袂記
kam-bi̍t tsîng-gī lân buē-kì
伊的笑容在目墘
i ê tshiò-iông tsāi ba̍k-kînn
傷心無了時
siong-sim bô-liáu-sî
哪通對阮巧言語
ná thang tuì gún khá giân-gí
將愛當做變把戲
tsiong ài tòng-tsuè piàn-pá-hì
感情全無留半絲
kám-tsîng tsuân bô lâu puànn-si
僥心一時
hiau-sim tsi̍t-sî
毋知佗位去
m̄-tsai tó-uī khì

你的假愛無情份
lí ê ké-ài bô tsîng-hūn
親像船過水無痕
tshin-tshiūnn tsûn kuè tsuí bô hûn
哪通予阮心憂悶
ná thang hōo gún sim iu-būn
夜夜思念彼當陣
iā-iā su-liām hit-tang-tsūn
予阮長怨恨
hōo gún tn̂g uàn-hūn
想欲割斷咱情份
siūnn-bueh kuah-tn̄g lán tsîng-hūn
毋知怎樣刀遮鈍
m̄-tsai tsánn-iūnn to tsiah tūn
露水愛情一時陣
lōo-tsuí ài-tsîng tsi̍t-sî-tsūn
露水愛情
lōo-tsuí ài-tsîng
浪費阮青春
lōng-huì gún tshing-tshun