誠心邀請

《誠心邀請》Sîng-sim Iau-tshiánn

林俊吉Lîm Tsùn-kiat

——————————————

你真迷人

lí tsin bê-lâng

像一蕊紅豔玫瑰

tshiūnn tsi̍t-luí âng-iām muî-kuì

非凡氣質優雅高貴

hui-huân khì-tsit iu-ngá ko-kuì

你的清芳

lí ê tshing-phang

像一句美麗籤詩

tshiūnn tsi̍t-kù bí-lē tshiam-si

險害阮袂記喘氣

hiám hāi gún buē-kì tshuán-khuì

阮足天真

gún tsiok thian-tsin

是一个純情男兒

sī tsi̍t-ê sûn-tsîng lâm-jî

佮你熟似

kah lí si̍k-sāi

是阮的福氣

sī gún ê hok-khì

千言萬語

tshian-giân bān-gí

原來咱遐爾投機

guân-lâi lán hiah-nī tâu-ki

若親像天生一對

ná-tshin-tshiūnn thian-sing tsi̍t-tuì

誠心邀請

sîng-sim iau-tshiánn

做阮今夜的舞伴

tsuè gún kim-iā ê bú-phuānn

愛情的雨傘

ài-tsîng ê hōo-suànn

阮會專心為你攑

gún ē tsuan-sim uī lí gia̍h

青春少年兄

tshing-tshun siàu-liân-hiann

愛著千金小姐

ài-tio̍h tshian-kim sió-tsiá

予人笑阮共天借膽

hōo-lâng tshiò gún kā thinn tsioh tám

誠心邀

sîng-sim iau

做阮今生的侶伴

tsuè gún kim-sing ê lī-phuānn

愛情的約訂

ài-tsîng ê iok-tiānn

彼是袂當退件

he sī buē-tàng thuè-kiānn

愛你的歌

ài lí ê kua

跳甲三更暝半

thiàu kah sann-kinn mî-puànn

愛你的心

ài lí ê sim

像日不落城

tshiūnn ji̍t put-lo̍h siânn