相逢大肚站

《相逢大肚站》Siong-hông Tuā-tōo-tsām

王江發Ông Kang-huat

——————————————

落南的列車喇叭聲

lo̍h-lâm ê lia̍t-tshia lá-pah siann

頭前就是大肚站矣

thâu-tsîng tiō-sī Tuā-tōo-tsām–ah

思鄉的心情

su-hiong ê sim-tsiânn

你敢知影

lí kám tsai-iánn

心愛就欲出現佇遐

sim-ài tiō-beh tshut-hiān tī hia

當初是你鼓勵著我

tong-tshoo sī lí kóo-lē tio̍h guá

天大地大

thinn tuā tē tuā

出去拍拚

tshut-khì phah-piànn

無論鹹酸抑苦汫

bô-lūn kiâm-sng ia̍h khóo-tsiánn

你欲佮我做伙食

lí beh kah guá tsò-hué tsia̍h

如今的我

jû-kim ê guá

帶著好名聲

tuà tio̍h hó miâ-siann

用愛呼喚你的名

iōng ài khoo-huàn lí ê miâ

若無你

nā bô lí

就無我

tiō bô guá

愛你的心袂變卦

ài lí ê sim buē piàn-kuà

受盡委屈佮拖磨

siū-tsīn uí-khut kah thua-buâ

耽誤青春為著我

tam-gōo tshing-tshun uī-tio̍h guá

就算賰一喙飯

tiō-sǹg tshun tsi̍t-tshuì pn̄g

嘛也欲予你食

mā beh hōo lí tsia̍h

大肚站外有你等佇遐

Tuā-tōo-tsām guā ū lí tán tī hia