流浪的命運

《流浪的命運》Liû-lōng ê Miā-ūn
明隆Bîng-liông
——————————————
吉他伴著我
gì-tah phuānn tio̍h guá
寂寞的流浪
tsi̍k-bo̍k ê liû-lōng
可比是孤星的命運
khó-pí sī koo-tshinn ê miā-ūn
今仔日東明日走西
kia̋nn-ji̍t tang bîng-ji̍t tsáu sai
為著生活走天涯
uī-tio̍h sing-ua̍h tsáu thian-gâi
無向望女性純情義
bô ǹg-bāng lú-sìng sûn-tsîng-gī
可愛的吉他
khó-ài ê gì-tah
是我心愛的人
sī guá sim-ài ê lâng

無論在船頂
bô-lūn tsāi tsûn-tíng
抑是酒場內
ia̍h-sī tsiú-tiûnn lāi
心酸悲也著獻笑容
sim sng-pi iā tio̍h hiàn tshiò-iông
為人客唸著情歌
uī lâng-kheh liām tio̍h tsîng-kua
忍耐一切的苦味
jím-nāi it-tshè ê khóo-bī
請姑娘毋免相掛意
tshiánn koo-niû m̄-bián sio-kuà-ì
可愛的吉他
khó-ài ê gì-tah
是我安慰的人
sī guá an-uì ê lâng

吉他佮歌聲
gì-tah kah kua-siann
唱出惜別詩
tshiùnn-tshut sioh-pia̍t si
港口的姑娘再會啦
káng-kháu ê koo-niû tsài-huē–lah
阮總是一个男性
gún tsóng-sī tsi̍t-ê lâm-sìng
哪會對你無感情
ná ē tuì lí bô kám-tsîng
為前途著愛去拍拚
uī tsiân-tôo tio̍h-ài khì phah-piànn
可愛的吉他
khó-ài ê gì-tah
是我思戀的人
sī guá su-luân ê lâng