天自有安排

《天自有安排》Thinn Tsū-iú An-pâi

林文德Lîm Bûn-tik

—————————————–

人生這條路

jîn-sing tsit tiâu lōo

有好就有䆀

ū hó tiō ū bái

無需要規工啊

bô su-iàu kui-kang–ah

失志來感慨

sit-tsì lâi kám-khài

做事著認真

tsuè-sū tio̍h jīn-tsin

項項照步來

hāng-hāng tsiàu-pōo-lâi

相信成功

siong-sìn sîng-kong

就是明仔載

tiō-sī bîn-á-tsài

鬱卒毋通囥心內

ut-tsut m̄-thang khǹg sim-lāi

痛苦無人知

thòng-khóo bô-lâng tsai

人生管伊東抑西

jîn-sing kuán i tang ia̍h sai

本來就海海

pún-lâi tiō hái-hái

毋免來欣羨別人好命

m̄-bián lâi him-siān pa̍t-lâng hó-miā

佮咱無底代

kah lán bô-tī-tāi

快樂生活才應該

khuài-lo̍k sing-ua̍h tsiah ing-kai

啊~天自有安排

ah~ thinn tsū iú an-pâi

若欲成功免驚失敗

nā beh sîng-kong bián-kiann sit-pāi

啊~天自有安排

ah~ thinn tsū iú an-pâi

總有一工

tsóng ū tsi̍t-kang

欲予人知

beh hōo-lâng tsai

堅強男兒的風采

kian-kiông lâm-jî ê hong-tshái