牽手是咱的名
《牽手是咱的名》Khan-tshiú Sī Lán ê Miâ
狄鶯 Ti̍k-ing
——————————————
往事若一幫火車
óng-sū ná tsi̍t-pang hué-tshia
每站有人離散
muí tsām ū-lâng lî-suànn
行過青春的海岸
kiânn kuè tshing-tshun ê hái-huānn
聽海湧咧唱歌
thiann hái-íng teh tshiùnn-kua
歌聲親像講感謝
kua-siann tshin-tshiūnn kóng kám-siā
有緣份才會仝車
ū iân-hūn tsiah-ē kāng tshia
相依倚
sio i-uá
才袂起畏寒
tsiah buē khí uì-kuânn
歲月若一張白紙
suè-gua̍t ná tsi̍t-tiunn pe̍h-tsuá
寫遭遇的變化
siá tso-gū ê piàn-huà
起起落落的心情
khí-khí-lo̍h-lo̍h ê sim-tsiânn
愛需要用心疼
ài su-iàu iōng-sim thiànn
人講人生風飛沙
lâng kóng jîn-sing hong-pue-sua
飛一山閣過一嶺
pue tsi̍t-suann koh kuè tsi̍t-niá
看孤單
khuànn koo-tuann
閣再看繁華
koh-tsài khuànn huân-huâ
牽手就是你叫阮的名
khan-tshiú tsiū-sī lí kiò gún ê miâ
毋管前途偌䆀
m̄-kuán tsiân-tôo guā bái
我毋驚
guá m̄-kiann
好額散赤
hó-gia̍h sàn-tshiah
攏是你佮我
lóng-sī lí kah guá
是運佮命
sī ūn kah miā
牽手就是阮叫你的名
khan-tshiú tsiū-sī gún kiò lí ê miâ
毋管跤步沉重做陣擔
m̄-kuán kha-pōo tîm-tāng tsuè-tīn tann
酸甜苦澀
sng-tinn khóo-siap
風雨有你
hong-hōo ū lí
生活有我
sing-ua̍h ū guá
這一生散步到遮
tse it-sing sàn-pōo kàu tsia
世事一場煙花
sè-sū tsi̍t-tiûnn ian-hua
囡仔一暝就變大
gín-á tsi̍t-mî tiō piàn tuā
為成功去拍拚
uī sîng-kong khì phah-piànn
坐踮往事的火車
tsē tiàm óng-sū ê hué-tshia
看歲月這張白紙
khuànn suè-gua̍t tsit tiunn pe̍h-tsuá
你是伴
lí sī phuānn
你是我的岸
lí sī guá ê huānn
牽手就是你叫阮的名
khan-tshiú tsiū-sī lí kiò gún ê miâ
毋管前途偌䆀
m̄-kuán tsiân-tôo guā bái
我毋驚
guá m̄-kiann
好額散赤
hó-gia̍h sàn-tshiah
攏是你佮我
lóng-sī lí kah guá
是運佮命
sī ūn kah miā
牽手就是阮叫你的名
khan-tshiú tsiū-sī gún kiò lí ê miâ
毋管跤步沉重做陣擔
m̄-kuán kha-pōo tîm-tāng tsuè-tīn tann
酸甜苦澀
sng-tinn khóo-siap
風雨有你
hong-hōo ū lí
生活有我
sing-ua̍h ū guá
一半惜一半疼
tsi̍t-puànn sioh tsi̍t-puànn thiànn
牽你的手我知影
khan lí ê tshiú guá tsai-iánn
幸福
hīng-hok
著愛一針一針車
tio̍h-ài tsi̍t-tsiam tsi̍t-tsiam tshia
車出溫暖感情這領衫
tshia tshut un-luán kám-tsîng tsit niá sann
幸福
hīng-hok
著愛一針一針車
tio̍h-ài tsi̍t-tsiam tsi̍t-tsiam tshia
車出圓滿牽手的心聲
tshia tshut uân-buán khan-tshiú ê sim-siann
