故鄉的路

《故鄉的路》Kòo-hiong ê Lōo

沈建豪Sím Kiàn-hô

——————————————

每擺看著故鄉的路

muí-pái khuànn-tio̍h kòo-hiong ê lōo

心內感覺真正無仝

sim-lāi kám-kak tsin-tsiànn bô-kāng

彼種完全的放鬆

hit tsióng uân-tsuân ê pàng-sang

已經真久毋捌像這款

í-king tsin kú m̄-bat tshiūnn tsit khuán

兩爿青青媠媠的稻仔園

nn̄g-pîng tshinn-tshinn suí-suí ê tiū-á-hn̂g

也有一隻水牛佇遐耍

iā ū tsi̍t-tsiah tsuí-gû tī hia sńg

舊低厝瓦佇咧門口埕

kū-kē tshù-hiā tī-leh mn̂g-kháu-tiânn

時常看著妗婆仔

sî-siông khuànn-tio̍h kīm-pô–á

咧曝高麗菜乾

teh pha̍k ko-lê-tshài-kuann

庄跤的親情佮序大

tsng-kha ê tshin-tsiânn kah sī-tuā

我已經慢慢欲轉來啦

guá í-king bān-bān beh tńg–lâi lah

阿母定定有講予我聽

a-bú tiānn-tiānn ū kóng hōo guá thiann

市內蹛久

tshī-lāi tuà kú

嘛愛轉來行行

mā ài tńg-lâi kiânn-kiânn

清芳的花味

tshing-phang ê hue-bī

加上呴呴呴的聲

ka-siōng kū-kú-kuh ê siann

這是足美麗的文化

tse sī tsiok bí-lē ê bûn-huà

遠遠看著

hn̄g-hn̄g khuànn-tio̍h

細漢的囡仔伴

sè-hàn ê gín-á-phuānn

擛手共我講

ia̍t-tshiú kā guá kóng

欸!你這馬好無啦

eh! lí tsit-má hó–bô lah