我行來海邊
《我行來海邊》Guá Kiânn Lâi Hái-pinn
沈懷一Sím Huâi-it
——————————————
你若欲聽我的故事
lí nā beh thiann guá ê kòo-sū
朋友
pîng-iú
我對庄跤來
guá tuì tsng-kha lâi
阿爸像祖先仝款
a-pâ tshiūnn tsóo-sian kāng-khuán
規世人討海
kui-sì-lâng thó-hái
阿母守著田園
a-bú siú tio̍h tshân-hn̂g
辛苦種作兼賣菜
sin-khóo tsìng-tsoh kiam bē-tshài
我釘佇廟埕跳家將
guá tìng tī biō-tiânn thiàu-ka-tsiòng
?迌盤撋結幫派
tshit-thô puânn-nuá kiat pang-phài
序大講猴囝你著愛思考
sī-tuā kóng kâu-kiánn lí tio̍h-ài su-khó
綴人讀冊做官舞錢財
tuè lâng tha̍k-tsheh tsò-kuann bú tsînn-tsâi
言者諄諄
giân–tsiá tsun-tsun
聽者藐藐
thiann–tsiá biáu-biáu
一个大風颱
tsi̍t-ê tuā hong-thai
結果阿爸煞無轉來
kiat-kó a-pâ suah bô tńg–lâi
我行來海邊
guá kiânn lâi hái-pinn
陪伴阿母
puê-phuānn a-bú
阿母逐工思念你
a-bú ta̍k-kang su-liām lí
我講阿母
guá kóng a-bú
天暗轉來歇睏
thinn àm tńg-lâi hioh-khùn
伊失魂恬恬流珠淚
i sit-hûn tiām-tiām lâu tsu-luī
離開學校第三工
lī-khui ha̍k-hāu tē-sann kang
我決心欲拍拚入工場
guá kuat-sim beh phah-piànn ji̍p kang-tiûnn
跤踏實地來學手藝
kha ta̍h si̍t-tē lâi o̍h tshiú-gē
心甘情願做烏手
sim kam tsîng guān tsò oo-tshiú
逐工騎著su-kú-tah上下班
ta̍k-kang khiâ tio̍h su-kú-tah siōng-hā-pan
奅姼仔接送小姑娘
phānn tshit-á tsiap-sàng sió koo-niû
青春如歌也快活
tshing-tshun jû kua iā khuìnn-ua̍h
雙人牽手四界遊
siang-lâng khan-tshiú sì-kè iû
有一工
ū-tsi̍t-kang
姼仔反胃閣溢刺酸
tshit-á huán-uī koh ik-tshiah-sng
憂悶我予伊腹肚有身孕
iu-būn guá hōo i pak-tóo ū sin-ūn
我雙手共伊攬牢牢
guá siang-tshiú kā-i lám tiâu-tiâu
阿母講
a-bú kóng
結婚
kiat-hun
一定會歹竹出好筍
it-tīng ē pháinn tik tshut hó sún
我行來海邊
guá kiânn lâi hái-pinn
向著海水
hiòng tio̍h hái-tsuí
喝出阿爸的名字
huah tshut a-pâ ê miâ-jī
報告阿爸
pò-kò a-pâ
我欲組織小家庭
guá beh tsoo-tsit sió ka-tîng
身邊愛人聽了
sin-pinn ài-jîn thiann-liáu
目屎滴
ba̍k-sái tih
九十八年穡頭少
káu-tsa̍p-peh nî sit-thâu tsió
因為拄著社會無景氣
in-uī tú-tio̍h siā-huē bô kíng-khì
銀行束絚救命錢
gîn-hâng sok-ân kiù-miā tsînn
頭家予錢莊驚甲走去覕
thâu-ke hōo tsînn-tsng kiann kah tsáu-khì bih
我憂愁
guá iu-tshiû
但是假做無要緊
tān-sī ké-tsò bô-iàu-kín
心內操煩睏袂去
sim-lāi tshau-huân khùn bē khì
尤其看著
iû-kî khuànn-tio̍h
猴囝佮媠某睏身邊
kâu-kiánn kah suí-bóo khùn sin-pinn
莫非這世人註定做散鬼
bo̍k-hui tsit-sì-lâng tsù-tiānn tsò sàn-kuí
有一工媠某講
ū tsi̍t-kang suí-bóo kóng
厝內攏無錢
tshù-lāi lóng bô tsînn
我無夠溫柔
guá bô-kàu un-jiû
煞大聲共應
suah tuā-siann kā ìn
失業我毋敢來告知
sit-gia̍p guá m̄-kánn lâi kò-ti
猶原照起工上班
iu-guân tsiàu-khí-kang siōng-pan
出門來海邊
tshut-mn̂g lâi hái-pinn
我行來海邊
guá kiânn lâi hái-pinn
孤單一人
koo-tuann tsi̍t-lâng
哭出心內的傷悲
khàu tshut sim-lāi ê siong-pi
向天向地
hiòng thinn hiòng tē
我捶心請問
guá tuî-sim tshiánn-mn̄g
有夢敢有媠
ū bāng kám ū suí
我行來海邊
guá kiânn lâi hái-pinn
想空想縫
siūnn-khang-siūnn-phāng
鬱卒無了時
ut-tsut bô-liáu-sî
雄雄聽著一聲
hiông-hiông thiann-tio̍h tsi̍t-siann
↓—–(口白)—–↓
– 阿爸 我抾著兩仙錢。
– A-pa, guá khioh-tio̍h nn̄g-sián tsînn.
— 好!乖!
— Hó! Kuai!
↑—–(口白)—–↑
彼个下晡佇海邊
hit-ê ē-poo tī hái-pinn
我鼻著人生的智慧
guá phīnn-tio̍h jîn-sing ê tì-huī
阿母猴囝佮媠某
a-bú kâu-kiánn kah suí-bóo
咱辛苦拍拚
lán sin-khóo phah-piànn
免失志
bián sit-tsì
