青春的情批

《青春的情批》Tshing-tshun ê Tsîng-phue

杜忻恬Tōo Him-thiâm

——————————————

咱講過幾千萬遍

lán kóng-kuè kuí tshian-bān piàn

講再會閣拖延

kóng tsài-huē koh thua-iân

像笑詼的誓言

tshiūnn tshiò-khue ê sè-giân

可能因為攏少年

khó-lîng in-uī lóng siàu-liân

袂曉歲月會變

buē-hiáu suè-gua̍t ē piàn

所以才毋知愛排練

sóo-í tsiah m̄-tsai ài pâi-liān

若是會當

nā-sī ē-tàng

閣再轉去彼一工

koh-tsài tńg-khì hit tsi̍t-kang

我欲將你攬絚絚

guá beh tsiong lí lám ân-ân

再一次沉醉記持

tsài tsi̍t-tshù tîm-tsuì kì-tî

心甘情願

sim kam tsîng guān

做夢的年歲

tsuè-bāng ê nî-huè

一張青春的情批

tsi̍t-tiunn tshing-tshun ê tsîng-phue

摻著對你的思念

tsham tio̍h tuì lí ê su-liām

掖踮風中飛

iā tiàm hong-tiong pue

懵懂已經過

bóng-tóng í-king kuè

只賰悲喜的輪迴

tsí tshun pi-hí ê lûn-huê

有你純真的笑容

ū lí sûn-tsin ê tshiò-iông

猶佇我心中徘徊

iáu tī guá sim-tiong pâi-huê

—

有咱曾經的愛

ū lán tsan-king ê ài

猶佇我心中徘徊

iáu tī guá sim-tiong pâi-huê