純情的花蕊

《純情的花蕊》Sûn-tsîng ê Hue-luí

李俊德Lí Tsùn-tik

——————————————

雖然是雙人來分離

sui-jiân sī siang-lâng lâi hun-lî

依依難捨你我情意

i-i lân-siá lí guá tsîng-ì

可比牛郎織女星

khó-pí Gû-nn̂g Tsit-lí-tshinn

雙人分東西

siang-lâng hun tang-sai

看天頂月娘佮星

khuànn thinn-tíng ge̍h-niû kah tshinn

加添阮的心內悲

ka-thiam gún ê sim-lāi pi

阮每日悲傷流目屎

gún muí-ji̍t pi-siong lâu ba̍k-sái

希望早日緊轉來

hi-bāng tsá-ji̍t kín tńg–lâi

在港邊風吹來微微

tsāi káng-pinn hong tshue–lâi bî-bî

看見海鳥飛來飛去

khuànn-kìnn hái-tsiáu pue-lâi-pue-khì

啥人知阮咧流淚

siánn-lâng tsai gún teh liû-luī

也是為著你

iā-sī uī-tio̍h lí

春天時桃花當開

tshun-thinn sî thô-hue tng khui

啥人知阮的心內

siánn-lâng tsai gún ê sim-lāi

來拜託月娘傳予伊

lâi pài-thok ge̍h-niû thuân hōo i

猶原堅心等著你

iu-guân kian-sim tán tio̍h lí

黃昏時孤單在窗邊

hông-hun sî koo-tuann tsāi thang-pinn

聽起外面風雨水滴

thiann khí guā-bīn hong-ú tsuí tih

純情花蕊毋願來

sûn-tsîng hue-luí m̄-guān lâi

閣再墜落去

koh-tsài tuī–lo̍h-khì

我永遠期待著你

guá íng-uán kî-thāi tio̍h lí

毋通將阮放袂記

m̄-thang tsiong gún pàng-buē-kì

甘願來度苦過日子

kam-guān lâi tōo-khóo kè ji̍t-tsí

保持純情的花蕊

pó-tshî sûn-tsîng ê hue-luí