故鄉的紅磚厝
《故鄉的紅磚厝》Kòo-hiong ê Âng-tsng Tshù
詞：施榮煥 Si Îng-huàn
曲：施敬靜 Si Kìng-tsǐng
李春麗Lí Tshun-lê
——————————–
(口白)—–↓
有一位華僑老阿姨
ū tsi̍t-uī huâ-kiâu lǎu a-î
參觀閩南五店市
tsham-kuan Bín-lâm Gǒo-tuìnn-tshī
看見古早紅磚仔古厝
khuànn-kìnn kóo-tsá âng-tsng-á kóo-tshù
想起伊細漢的代誌
siǔnn-khí i sè-hàn ê tāi-tsì
(口白)—–↑
阮兜徛踮大海墘
gún-tau khiǎ tiàm tuā-hái kînn
彼款紅磚仔古厝
hit khuán âng-tsng-á kóo-tshù
真稀奇
tsin hi-kî
燕尾脊
ìnn-bué tsit
皇宮起
hông-kiong khí
出楗簷墘
tshut kīng tsînn-kînn
留深井
lâu tshim-tsínn
聽講這是祖宗辛苦來建置
thiann-kóng tse sǐ tsóo-tsong sin-khóo lâi kiàn-tì
一家大細做伙
tsi̍t-ka tuā-suè tsò-hué
足趣味
tsiok tshù-bī
老叔公彈著琵琶念歌詩
lǎu-tsik-kong tuânn tio̍h kî-pê liām kua-si
老嬸婆講起古早的代誌
lǎu-tsím-pô kóng-khí kóo-tsá ê tāi-tsì
早時祖公啊番爿做生理
tsá-sî tsóo-kong–ah huan-pîng tsò-sing-lí
勤勞拍拚是咱厝的風氣
khûn-lô phah-piànn sǐ lán-tshù ê hong-khì
記著阿媽的教示
kì tio̍h a-má ê kà-sī
徛厝攏著好厝邊
khiā-tshù lóng tio̍h hó tshù-pinn
食著甘密的番薯
tsia̍h tio̍h kam-bi̍t ê han-tsî
想起辛苦的阿母味
siǔnn-khí sin-khóo ê a-bú bī
看著故鄉的新景緻
khuànn tio̍h kòo-hiong ê sin kíng-tì
鄉村變成繁華的都市
hiong-tshun piàn-sîng huân-huâ ê too-tshǐ
彼幾間的紅磚仔古厝
hit kuí king ê âng-tsng-á kóo-tshù
攏是祖先拍拚的記持
lóng-sǐ tsóo-sing phah-piànn ê kì-tî
予咱艱苦創業的教示
hōo lán kan-khóo tshòng-gia̍p ê kà-sī
教咱世代囝孫
kà lán sè-tāi kiánn-sun
永遠著有志氣
íng-uán tio̍h ǔ tsì-khì
