你開阮的門
《你開阮的門》Lí Khui Gún ê Mn̂g
李婭莎Lí À-so
——————————————
抱我彼工
phō guá hit kang
我咧哭
guá teh khàu
你的喙
lí ê tshuì
笑甲合袂牢
tshiò kah ha̍p buē-tiâu
身邊朋友綴咧笑
sin-pinn pîng-iú tuè leh tshiò
你講笑容是滿足
lí kóng tshiò-iông sī buán-tsiok
彼時陣的窗邊
hit sî-tsūn ê thang-pinn
攏是我的相片
lóng-sī guá ê siòng-phìnn
房間內睏甲遐爾甜
pâng-king lāi khùn kah hiah-nī tinn
幸福的芳味
hīng-hok ê phang-bī
你開阮的門
lí khui gún ê mn̂g
驚來吵著阮
kiann lâi tshá-tio̍h gún
輕輕搖阮到天光
khin-khin iô gún kàu thinn kng
牽阮行遮遠
khan gún kiânn tsiah hn̄g
會記得親像昨昏
ē-kì-tit tshin-tshiūnn tsa-hng
床邊寶貝阮
tshn̂g-pinn pó-puè gún
規暝陪阮袂愛睏
kui-mî puê gún buē ài-khùn
你講故事予阮聽
lí kóng kòo-sū hōo gún thiann
嗯~講故事予阮聽
ngh~ kóng kòo-sū hōo gún thiann
問我彼暝哪咧哭
mn̄g guá hit mî ná teh khàu
你無來共我牽牢牢
lí bô lâi kā guá khan tiâu-tiâu
放手予我家己行
pàng-tshiú hōo guá ka-kī kiânn
你講目屎是勇敢
lí kóng ba̍k-sái sī ióng-kám
彼時陣的窗外
hit-sî-tsūn ê thang-guā
風雨遐爾大
hong-hōo hiah-nī tuā
你若親像我的雨幔
lí ná-tshin-tshiūnn guá ê hōo-mua
出門袂閣寒
tshut-mn̂g buē koh kuânn
你開阮的門
lí khui gún ê mn̂g
驚阮心悶悶
kiann gún sim būn-būn
慢慢開著你的車
bān-bān khui tio̍h lí ê tshia
載阮來去耍
tsài gún lâi-khì sńg
會記得彼段青春
ē-kì-tit hit tuānn tshing-tshun
心肝亂紛紛
sim-kuann luān hun-hun
有你陪伴
ū lí puê-phuānn
心就軟
sim tiō nńg
阮講心事予你聽
gún kóng sim-sū hōo lí thiann
嗯~講心事予你聽
ngh~ kóng sim-sū hōo lí thiann
離開彼工我無哭
lī-khui hit-kang guá bô khàu
我會來共你記牢牢
guá ē lâi kā lí kì tiâu-tiâu
身邊有人來照顧
sin-pinn ū-lâng lâi tsiàu-kòo
你就放心慢慢行
lí tiō hòng-sim bān-bān kiânn
明仔載的窗邊
bîn-á-tsài ê thang-pinn
我隨風來揣你
guá suî hong lâi tshuē lí
你是天邊的彼粒星
lí sī thinn-pinn ê hit lia̍p tshinn
攑頭就看見
gia̍h-thâu tiō khuànn-kìnn
你開阮的門
lí khui gún ê mn̂g
是你來看阮
sī lí lâi khuànn gún
換我開著你的車
uānn guá khui tio̍h lí ê tshia
載你來去轉
tsài lí lâi-khì tńg
袂記得路有偌長
buē-kì-tit lōo ū guā tn̂g
思念有偌遠
su-liām ū guā hn̄g
我會等你來開門
guá ē tán lí lâi khui-mn̂g
咱講往事到天荒
lán kóng óng-sū kàu thinn hng
你開阮的門
lí khui gún ê mn̂g
是你來看阮
sī lí lâi khuànn gún
慢慢開著你的車
bān-bān khui tio̍h lí ê tshia
載阮來去耍
tsài gún lâi-khì sńg
袂記得路有偌長
buē-kì-tit lōo ū guā tn̂g
思念有偌遠
su-liām ū guā hn̄g
我會等你來開門
guá ē tán lí lâi khui-mn̂g
咱講往事到天荒
lán kóng óng-sū kàu thinn hng
嗯~講往事到天荒
ngh~ kóng óng-sū kàu thinn hng
