阿公

《阿公》A-kong
李沛瑋Lí Phài-uí
——————————————
牽你的手學行路
khan lí ê tshiú o̍h kiânn-lōo
一字一字教阮講hō-ló
tsi̍t-jī tsi̍t-jī kà gún kóng hō-ló
我會記得去拜拜彼條路
guá ē-kì-tit khì pài-pài hit tiâu lōo
親情朋友的笑容
tshin-tsiânn pîng-iú ê tshiò-iông

坐你的烏肚䆀盹龜
tsē lí ê oo-tóo-bái tuh-ku
睏一醒已經到厝
khùn tsi̍t-tshínn í-king kàu tshù
你敢會記抱我落車
lí kám ē kì phō guá lo̍h-tshia
捏牢牢是你買的糖仔
tēnn tiâu-tiâu sī lí bé ê thn̂g-á

阿公你毋免閣煩惱
a-kong lí m̄-bián koh huân-ló
人生的道理你攏有講
jîn-sing ê tō-lí lí lóng ū kóng
為將來四界去走傱
uī tsiong-lâi sì-kè khì tsáu-tsông
歹勢問
pháinn-sè mn̄g
問你有想我無
mn̄g lí ū siūnn guá bô

阿公你毋免閣煩惱
a-kong lí m̄-bián koh huân-ló
聽你講古
thiann lí kóng-kóo
我袂閣嫌囉嗦
guá bē koh hiâm lo-so
轉來去庄跤的大瓦厝
tńg-lâi-khì tsng-kha ê tuā hiā-tshù
看無你
khuànn-bô lí
我心肝會艱苦
guá sim-kuann ē kan-khóo
—

天若光
thinn nā kng
咱來拜拜好毋好
lán lâi pài-pài hó m̄-hó