遙遠的牽掛
《遙遠的牽掛》Iâu-uán ê Khian-kuà
李明洋Lí Bîng-iông
——————————————
日頭已經漸漸落山
ji̍t-thâu í-king tsiām-tsiām lo̍h-suann
陣陣風吹來
tsūn-tsūn hong tshue–lâi
淡薄仔寒
tām-po̍h-á kuânn
想著故鄉的爸母
siūnn-tio̍h kòo-hiong ê pē-bú
天冷愛疊衫
thinn líng ài tha̍h-sann
茫茫人海中
bâng-bâng jîn-hái-tiong
恁是我遙遠的牽掛
lín sī guá iâu-uán ê khian-kuà
今夜揣無天星來做伴
kim-iā tshuē-bô thinn-tshinn lâi tsuè-phuānn
只有故鄉月娘
tsí-ū kòo-hiong gue̍h-niû
伊了解我
i liáu-kái guá
請恁毋通煩惱我
tshiánn lín m̄-thang huân-ló guá
我會認真拍拚
guá ē jīn-tsin phah-piànn
才袂辜負恁
tsiah buē koo-hū lín
辛苦將阮晟
sin-khóo tsiong gún tshiânn
喔~阿爸你著愛勇健
ooh~ a-pah lí tio̍h-ài ióng-kiānn
阿母啊
a-bú–ah
你著穿予燒
lí tio̍h tshīng hōo sio
食予飽
tsia̍h hōo pá
雖然離鄉千里外
sui-jiân lî-hiong tshian-lí guā
請你毋通受風寒
tshiánn lí m̄-thang siū hong-kuânn
因為恁的鼓勵
in-uī lín ê kóo-lē
才有成功的我
tsiah ū sîng-kong ê guá
喔~阿爸你著保重啦
ooh~ a-pah lí tio̍h pó-tiōng–lah
阿母的手
a-bú ê tshiú
你著替阮將伊牽予倚
lí tio̍h thè gún tsiong i khan hōo uá
等我回鄉將某娶
tán guá huê-hiong tsiong bóo tshuā
予咱一家做伙蹛
hōo lán tsi̍t-ke tsò-hué tuà
過著快樂幸福
kuè tio̍h khuài-lo̍k hīng-hok
美滿的生活
bí-buán ê sing-ua̍h
—
等我回鄉將某娶
tán guá huê-hiong tsiong bóo tshuā
予咱一家做伙蹛
hōo lán tsi̍t-ke tsò-hué tuà
過著快樂幸福
kuè tio̍h khuài-lo̍k hīng-hok
美滿的生活
bí-buán ê sing-ua̍h
