異鄉悲戀夢

《異鄉悲戀夢》Ī-hiong Pi-luân Bāng
吳晉淮Ngôo Tsìn-huâi
——————————————
稀微的月暗暝
hi-bî ê ge̍h-àm-mî
東爿一粒星
tang-pîng tsi̍t-lia̍p tshinn
伴著阮身在異鄉
phuānn tio̍h gún sin tsāi ī-hiong
無聊過深更
bô-liâu kè tshim-kinn
現在來想起著伊
hiān-tsāi lâi siūnn-khí tio̍h i
雖然心哀悲
sui-jiân sim ai-pi
已經是無法見面
í-king sī bô-huat kìnn-bīn
無緣的情侶
bô-iân ê tsîng-lī

一切的青春夢
it-tshè ê tshing-tshun bāng
為伊來犧牲
uī i lâi hi-sing
靠吉他流浪街巷
khò gì-tah liû-lōng ke-hāng
無聊過半生
bô-liâu kè puàn-sing
若親像可愛彼个
ná-tshin-tshiūnn khó-ài hit-ê
無情的女性
bô-tsîng ê lú-sìng
為怎樣聽我歌聲
uī-tsuánn-iūnn thiann guá kua-siann
目屎滴胸前
ba̍k-sái tih hing-tsîng

夢中的意中人
bāng-tiong ê ì-tiong-lâng
對我情義重
tuì guá tsîng-gī tāng
黎明時心情空虛
lê-bîng sî sim-tsîng khang-hi
無聊添苦痛
bô-liâu thiam khóo-thàng
離開伊茫茫過日
lī-khui i bông-bông kè-ji̍t
一年又半冬
tsi̍t-nî iū puànn-tang
期待著年久月深
kî-thāi tio̍h nî-kú-ge̍h-tshim
心頭漸輕鬆
sim-thâu tsiām khin-sang