愛像流星
《愛像流星》Ài Tshiūnn Liû-tshinn
吳勇濱Ngôo Ióng-pin
——————————————
我拍開過去
guá phah-khui kuè-khì
你我愛的行李
lí guá ài ê hîng-lí
房間內
pâng-king lāi
只賰空虛的氣味
tsí tshun khang-hi ê khì-bī
敢是你決定
kám-sī lí kuat-tīng
佮伊遠走高飛
kah i uán-tsáu ko-hui
閣講啥物攏無所謂
koh kóng siánn-mih lóng bû-sóo-uī
目睭金金
ba̍k-tsiu kim-kim
看著你恬恬離開
khuànn tio̍h lí tiām-tiām lī-khui
留予我一支傷心的鎖匙
lâu hōo guá tsi̍t-ki siong-sim ê só-sî
叫我怎樣
kiò guá tsuánn-iūnn
去面對無你的暝
khì bīn-tuì bô lí ê mî
所有痴心一場枉費
sóo-ū tshi-sim tsi̍t-tiûnn óng-huì
這个無情城市
tsit ê bô-tsîng siânn-tshī
愛像流星
ài tshiūnn liû-tshinn
落寞的稀微
lo̍k-bo̍k ê hi-bî
過去纏綿
kuè-khì tînn-mî
只是阮夢中一齣戲
tsí-sī gún bāng-tiong tsi̍t-tshut hì
這个無情城市
tsit ê bô-tsîng siânn-tshī
愛像流星
ài tshiūnn liû-tshinn
真心佇佗位
tsin-sim tī tó-uī
喝一聲
huah tsi̍t-siann
我的傷悲
guá ê siong-pi
有啥人安慰
ū siánn-lâng an-uì
—
越頭看甜蜜景緻
ua̍t-thâu khuànn tinn-bi̍t kíng-tì
如今只是笑詼而已
jû-kim tsí-sī tshiò-khue jî í
何必為你半夢也半醒
hô-pit uī lí puànn-bāng iā puànn-tshínn
咱的愛像閃爍的流星
lán ê ài tshiūnn siám-sih ê liû-tshinn
