單思調

《單思調》Tuann-su-tiāu
吳晉淮Ngôo Tsìn-huâi
——————————————
風雨落無停
hong-ú lo̍h bô thîng
無意中想出著伊
bô-ì-tiong siūnn tshut tio̍h i
可愛的面形
khó-ài ê bīn-hîng
自彼日相會以來
tsū hit ji̍t siong-huē í-lâi
對伊暗思情
tuì i àm su-tsîng
毋知怎樣心袂清
m̄-tsai tsuánn-iūnn sim buē tshing
精神袂冷靜
tsing-sîn buē líng-tsīng
日思暮想的心境
ji̍t-su bōo-siūnn ê sim-kíng
毋敢表分明
m̄-kánn piáu hun-bîng

夜半露水重
iā-puànn lōo-tsuí tāng
無元氣也是想伊
bô guân-khì iā-sī siūnn i
悶悶心袂鬆
būn-būn sim buē sang
我對伊思念不斷
guá tuì i su-liām put-tuān
有時愈思夢
ū-sî jú su-bāng
為何伊會毋知我
uī-hô i ē m̄-tsai guá
真情對伊送
tsin-tsîng tuì i sàng
哪通予我青春夢
ná thang hōo guá tshing-tshun bāng
變成一場空
piàn-sîng tsi̍t-tiûnn khang