你是我一生的歌

《你是我一生的歌》Lí Sī Guá It-sing ê Kua
吳勇濱Ngôo Ióng-pin
——————————————
一條光線
tsi̍t-tiâu kng-suànn
照著阮消瘦的形影
tsiò tio̍h gún siau-sán ê hîng-iánn
窗內的人
thang-lāi ê lâng
是稀微的心情
sī hi-bî ê sim-tsiânn
上驚聽著
siōng kiann thiann-tio̍h
彼个深情的歌聲
hit ê tshim-tsîng ê kua-siann
是仝款的心
sī kāng-khuán ê sim
有無仝款的運命
ū bô kāng-khuán ê ūn-miā

一幫火車
tsi̍t-pang hué-tshia
恬恬行過歲月的路段
tiām-tiām kiânn kuè suè-gua̍t ê lōo-tuānn
窗外景色
thang-guā kíng-sik
猶原孤孤單單
iu-guân koo-koo-tuann-tuann
毋通問我
m̄-thang mn̄g guá
生活是為著啥
sing-ua̍h sī uī-tio̍h siánn
阮只是貪戀
gún tsí-sī tham-luân
一點幸福的感覺
tsi̍t-tiám hīng-hok ê kám-kak

有一條歌
ū tsi̍t-tiâu kua
用阮一生來寫
iōng gún it-sing lâi siá
只有真情的人
tsí-ū tsin-tsîng ê lâng
陪阮來聽
puê gún lâi thiann
漂浪的心袂靠岸
phiau-lōng ê sim buē khò-huānn

有一條歌
ū tsi̍t-tiâu kua
用阮性命來寫
iōng gún sìnn-miā lâi siá
等無心內的人
tán bô sim-lāi ê lâng
唱予阮聽
tshiùnn hōo gún thiann
親像一首無言的歌
tshin-tshiūnn tsi̍t-siú bô-giân ê kua