一生的愛
《一生的愛》It-sing ê Ài
吳勇濱Ngôo Ióng-pin
——————————————
感謝你願意
kám-siā lí guān-ì
囥我佇你的心內
khǹg guá tī lí ê sim-lāi
相信有我的日子
siong-sìn ū guá ê ji̍t-tsí
永遠會有光彩
íng-uán ē ū kong-tshái
你全心共家己
lí tsuân-sim kā ka-kī
交予我來安排
kau hōo guá lâi an-pâi
你就是我一生的愛
lí tiō-sī guá it-sing ê ài
你講我對你的好
lí kóng guá tuì lí ê hó
親像是無邊的海
tshin-tshiūnn sī bô-pinn ê hái
我講袂放你一个人
guá kóng buē pàng lí tsi̍t-ê-lâng
孤單的世界
koo-tuann ê sè-kài
你全心共家己
lí tsuân-sim kā ka-kī
交予我來安排
kau hōo guá lâi an-pâi
你就是我一生的愛
lí tiō-sī guá it-sing ê ài
你哪會哪會哪會
lí ná ē ná ē ná ē
哪會遮爾可愛
ná ē tsiah-nī khó-ài
我一定一定
guá it-tīng it-tīng
一定會用心對待
it-tīng ē iōng-sim tuì-thāi
規畫的未來
kui-huā ê bī-lâi
會一直囥佇心內
ē it-ti̍t khǹg tī sim-lāi
你就是我一生的愛
lí tiō-sī guá it-sing ê ài
這一路行來
tse tsi̍t-lōo kiânn–lâi
冤家了後互相了解
uan-ke liáu-āu hōo-siong liáu-kái
艱苦時陣
kan-khóo sî-tsūn
咱互相鬥陣忍耐
lán hōo-siong tàu-tīn jím-nāi
人講這是
lâng kóng tse sī
天賜姻緣的安排
thinn sù in-iân ê an-pâi
你就是我一生的愛
lí tiō-sī guá it-sing ê ài
這一路行來
tse tsi̍t-lōo kiânn–lâi
有偌濟話囥佇心內
ū guā-tsē uē khǹg tī sim-lāi
阮想欲對你講出來
gún siūnn-beh tuì lí kóng–tshut-lâi
阮袂辜負你對我的期待
gún buē koo-hū lí tuì guá ê kî-thāi
你就是我一生的愛
lí tiō-sī guá it-sing ê ài
一生的愛
it-sing ê ài
