落車

《落車》Lo̍h-tshia
吳淑敏Ngôo Siok-bín
——————————————
你將車停佇路邊
lí tsiong tshia thîng tī lōo-pinn
點薰吐著大氣
tiám-hun thóo tio̍h tuā-khuì
有話欲講
ū uē beh kóng
閣吞落去
koh thun–lo̍h-khì
我嘛希望
guá mā hi-bāng
你莫提起
lí mài thê-khí

窗外開始落雨
thang-guā khai-sí lo̍h-hōo
阮的心肝愈艱苦
gún ê sim-kuann jú kan-khóo
希望你會當對我講
hi-bāng lí ē-tàng tuì guá kóng
你佮伊
lí kah i
只是一時的糊塗
tsí-sī tsi̍t-sî ê hôo-tôo

你對阮唱過的情歌
lí tuì gún tshiùnn kuè ê tsîng-kua
敢有仝款唱予伊聽
kám ū kāng-khuán tshiùnn hōo i thiann
這片你我散步的海岸
tsit phìnn lí guá sàn-pōo ê hái-huānn
敢也有恁行過的形影
kám iā ū lín kiânn–kuè ê hîng-iánn

莫講阮放你受孤單
mài-kóng gún pàng lí siū koo-tuann
咱的約束講過準煞
lán ê iok-sok kóng–kuè tsún-suah
既然這條情路遐歹行
kì-jiân tsit tiâu tsîng-lōo hiah pháinn-kiânn
到遮擋定
kàu tsia tòng-tiānn
放阮落車
pàng gún lo̍h-tshia
—

你對阮講過的情話
lí tuì gún kóng–kuè ê tsîng-uē
敢有對伊閣講一擺
kám ū tuì i koh kóng tsi̍t-pái
這條你我祕密的小路
tsit tiâu lí guá pì-bi̍t ê sió-lōo
敢也是恁約會的所在
kám iā-sī lín iok-huē ê sóo-tsāi

莫講阮放你受孤單
mài-kóng gún pàng lí siū koo-tuann
咱的約束
lán ê iok-sok
講過準煞
kóng–kuè tsún-suah
既然這條情路
kì-jiân tsit tiâu tsîng-lōo
遐歹行
hiah pháinn-kiânn
到遮擋定
kàu tsia tòng-tiānn
放阮落車
pàng gún lo̍h-tshia

管伊外面有雨
kuán i guā-bīn ū hōo
路歹行
lōo pháinn-kiânn
到遮擋定
kàu tsia tòng-tiānn
放阮下車
pàng gún lo̍h-tshia