胭脂夢
《胭脂夢》Ian-tsi Bāng
吳淑敏Ngôo Siok-bín
——————————————
阮的心是等待
gún ê sim sī tán-thāi
春天盛開的花蕊
tshun-thinn sīng-khai ê hue-luí
思念是
su-liām sī
甜蜜的雨水
tinn-bi̍t ê hōo-tsuí
阮的愛是期待
gún ê ài sī kî-thāi
佮天熱戀的風吹
kah thinn jia̍t-luân ê hong-tshue
會揣著幸福的所在飛
ē tshuē-tio̍h hīng-hok ê sóo-tsāi pue
阮的心是等待
gún ê sim sī tán-thāi
春風留戀的世界
tshun-hong liû-luân ê sè-kài
看心事
khuànn sim-sū
親像雲吹開
tshin-tshiūnn hûn tshue-khai
阮的愛是摻著
gún ê ài sī tsham tio̍h
綿綿情意的相思
mî-mî tsîng-ì ê siunn-si
風若過
hong nā kuè
會點著情火
ē tiám tio̍h tsîng-hué
青春是一場
tshing-tshun sī tsi̍t-tiûnn
單純白色的夢
tan-sûn pe̍h-sik ê bāng
阮希望
gún hi-bāng
夢著多情的人
bāng-tio̍h to-tsîng ê lâng
面抹甲遐爾紅
bīn buah kah hiah-nī âng
幸福的胭脂芳
hīng-hok ê ian-tsi phang
欲佮伊牽手過一世人
beh kah i khan-tshiú kuè tsi̍t-sì-lâng
青春是一場
tshing-tshun sī tsi̍t-tiûnn
可愛袂醒的夢
khó-ài buē tshínn ê bāng
阮希望
gún hi-bāng
夢見真心的人
bāng-kìnn tsin-sim ê lâng
面抹甲遐爾紅
bīn buah kah hiah-nī âng
坐佇咧窗邊望
tsē tī-leh thang-pinn bāng
望過阮孤單的胭脂夢
bāng kuè gún koo-tuann ê ian-tsi bāng
