碧潭假期

《碧潭假期》Phik-thâm Kà-kî
吳晉淮Ngôo Tsìn-huâi
——————————————
風和日暖好天氣
hong-hô ji̍t-luán hó thinn-khì
好天氣
hó thinn-khì
炎熱日頭出上天
iām-jia̍t ji̍t-thâu tshut tsiōnn-thinn
鳥聲亂亂啼
tsiáu-siann luān-luān thî
謼咿呶謼咿
hooh-ih-nooh hooh-ih
頂日我有約束伊
tíng-ji̍t guá ū iok-sok i
碧潭過假期
Phik-thâm kè kà-kî
滿面春風歡歡喜喜
muá-bīn tshun-hong huann-huann-hí-hí
景色笑微微
kíng-sik tshiò bî-bî
咱雙人洋洋得意
lán siang-lâng iông-iông tik-ì
合唱青春詩謼咿
ha̍p-tshiùnn tshing-tshun si–hooh-ih

雙人行過鐵線橋
siang-lâng kiânn kè thih-suànn-kiô
鐵線橋
thih-suànn-kiô
沿路那行峇文笑
iân-lōo ná kiânn bā-bûn tshiò
毋管日頭燒
m̄-kuán ji̍t-thâu sio
謼咿呶謼咿
hooh-ih-nooh hooh-ih

半坐半倒樹跤歇
puànn-tsē puànn-tó tshiū-kha hioh
手攬妹身腰
tshiú lám muāi sin-io
水邊男女雜音亂叫
tsuí-pinn lâm-lú tsa̍p-im luān kiò
鬧熱哈哈笑
lāu-jia̍t ha-ha tshiò
划小船雙雙影照
kò sió-tsûn siang-siang iánn tsiò
靜靜水面搖謼咿
tsīng-tsīng tsuí-bīn iô–hooh-ih

今來坐在遊覽船
tann lâi tsē tsāi iû-lám-tsûn
遊覽船
iû-lám-tsûn
妹妹並倚貼心君
muāi-muāi phīng-uá tah-sim kun
潭中慢慢遊
thâm-tiong bān-bān iû
謼咿呶謼咿
hooh-ih-nooh hooh-ih

船在水邊咧歇睏
tsûn tsāi tsuí-pinn teh hioh-khùn
談情笑文文
tâm-tsîng tshiò bûn-bûn
不怕世人啥款議論
put-phà sè-jîn siánn-khuán gī-lūn
天青無風雲
thinn tshinn bô hong-hûn
妹有情規日伴阮
muāi iú-tsîng kui-ji̍t phuānn gún
遊賞到黃昏謼咿
iû-siúnn kàu hông-hun–hooh-ih