故鄉臺江

《故鄉臺江》Kòo-hiong Tâi-kang

吳木Ngôo Bo̍k

——————————————

細漢離家來拍拚

sè-hàn lî-ka lâi phah-piànn

看人面色過生活

khuànn lâng bīn-sik kuè sing-ua̍h

想起故鄉的阿母啊

siūnn-khí kòo-hiong ê a-bú–ah

人在他鄉心袂定

jîn tsāi thann-hiong sim buē tiānn

一跤踏入門口埕

tsi̍t-kha ta̍h ji̍p mn̂g-kháu-tiânn

不孝囝轉來矣

put-hàu-kiánn tńg–lâi ah

故鄉臺江的心情

kòo-hiong Tâi-kang ê sim-tsiânn

江水聲聲催心肝

kang-tsuí siann-siann tshui sim-kuann

昔日少年兄

sik-ji̍t siàu-liân-hiann

喙鬚變白才心驚

tshuì-tshiu piàn pe̍h tsiah sim kiann

故鄉臺江的人啊

kòo-hiong Tâi-kang ê lâng–ah

彼是啥人的背影

he sī siánn-lâng ê puē-iánn

輕輕叫著心愛你的名

khin-khin kiò tio̍h sim-ài lí ê miâ

身邊無伴

sin-pinn bô phuānn

月光照影

gue̍h-kng tsiò iánn

人孤單

lâng koo-tuann