我是漂浪的海鳥

《我是漂浪的海鳥》Guá Sī Phiau-lōng ê Hái-tsiáu
吳晉淮Ngôo Tsìn-huâi
——————————————
你應該知影海鳥
lí ìng-kai tsai-iánn hái-tsiáu
本性是漂浪的唷
pún-sìng sī phiau-lōng ê–iooh
為怎樣對我鍾情
uī-tsuánn-iūnn tuì guá tsiong-tsîng
又來心袂清
iū lâi sim buē tshing
最好是請你忍耐唷
tsuè-hó sī tshiánn lí jím-nāi–iooh
最好是請你忍耐唷
tsuè-hó sī tshiánn lí jím-nāi–iooh
我聽著鑼聲若響
guá thiann-tio̍h lô-siann nā hiáng
猶原心悲傷
iu-guân sim pi-siong

咱雙人雖然一暗
lán siang-lâng sui-jiân tsi̍t-àm
無意中見面的唷
bô-ì-tiong kìnn-bīn–ê iooh
為怎樣會來偏偏
uī-tsuánn-iūnn ē lâi phian-phian
結了感情緣
kiat liáu kám-tsîng iân
最好是請你等待唷
tsuè-hó sī tshiánn lí tán-thāi–iooh
最好是請你等待唷
tsuè-hó sī tshiánn lí tán-thāi–iooh
我一定閣再轉來
guá it-tīng koh-tsài tńg–lâi
回復咱情愛
huê-ho̍k lán tsîng-ài

我已經對你講起
guá í-king tuì lí kóng-khí
離開是暫時的唷
lī-khui sī tsiām-sî ê–iooh
為怎樣你來哀悲
uī-tsuánn-iūnn lí lâi ai-pi
毋願我分離
m̄-guān guá hun-lī
最好是請你相信唷
tsuè-hó sī tshiánn lí siong-sìn–iooh
最好是請你相信唷
tsuè-hó sī tshiánn lí siong-sìn–iooh
我無論飛到天邊
guá bô-lūn pue kàu thinn-pinn
猶原思念你
iu-guân su-liām lí