大聲來唱歌

《大聲來唱歌》Tuā-siann Lâi Tshiùnn-kua
吳淑敏Ngôo Siok-bín
——————————————
心情䆀
sim-tsîng bái
無人陪伴
bô-lâng puê-phuānn
一通電話緊敲予我
tsi̍t-thong tiān-uē kín khà hōo guá
歹年冬
pháinn-nî-tang
隨人顧性命
suî-lâng kòo sìnn-miā
咱的感情永遠佇遮
lán ê kám-tsîng íng-uán tī tsia

KTV點幾條仔歌
KTV tiám kuí-tiâu-á kua
燒酒準備啉予伊焦
sio-tsiú tsún-pī lim hōo-i ta
煩惱就來看破
huân-ló tiō lâi khuànn-phuà
將悲傷唱出來
tsiong pi-siong tshiùnn–tshut-lâi
較快活
khah khuìnn-ua̍h

大聲來唱歌
tuā-siann lâi tshiùnn-kua
你毋是一个人孤單
lí m̄-sī tsi̍t-ê-lâng koo-tuann
踮遮無人共你趕
tiàm tsia bô-lâng kā lí kuánn
欲唱到天光
beh tshiùnn kàu thinn-kng
才準煞
tsiah tsún-suah

大聲鬥陣來唱歌
tuā-siann tàu-tīn lâi tshiùnn-kua
免驚歹聽
bián-kiann pháinn-thiann
嘛免驚梢聲
mā bián-kiann sau-siann
一時的失敗
tsi̍t-sî ê sit-pāi
怨嘆無較縒
uàn-thàn bô-khah-tsua̍h
咱來相招
lán lâi sio-tsio
做陣拍拚
tsuè-tīn phah-piànn