做夢嘛會笑

《做夢嘛會笑》Tsò-bāng Mā ē Tshiò

吳俊宏Ngôo Tsùn-hông

——————————————

想著熟似彼一工

siūnn-tio̍h si̍k-sāi hit-tsi̍t-kang

親像咧做眠夢

tshin-tshiūnn teh tsuè bîn-bāng

從來嘛毋捌遮好空

tsiông-lâi mā m̄-bat tsiah hó-khang

敢是天公疼戇人

kám-sī thinn-kong thiànn gōng-lâng

美麗可愛

bí-lē khó-ài

氣質超凡

khì-tsit tshiau-huân

配著伊的長頭鬃

phuè tio̍h i ê tn̂g-thâu-tsang

我是修理水電

guá sī siu-lí tsuí-tiān

兼塗水工

kiam thôo-tsuí-kang

恐驚伊看阮無夠重

khióng-kiann i khuànn gún bô-kàu-tāng

伊講阮是一个

i kóng gún sī tsi̍t-ê

拍拚又勤儉

phah-piànn iū khîn-khiām

實實在在做工仔人

si̍t-si̍t-tsāi-tsāi tsuè-kang-á-lâng

毋管啥物頭路

m̄-kuán siánn-mih thâu-lōo

伊攏無棄嫌

i lóng bô khì-hiâm

只是環境小可無仝款

tsí-sī khuân-kíng sió-khuá bô kāng-khuán

啊~伊就是愛我

ah~ i tsiū-sī ài guá

無你是按怎

bô, lí sī-án-tsuánn

伊是阮的

i sī gún ê

你免流喙瀾

lí bián lâu tshuì-nuā

阮袂講很醜

gún buē kóng hěn chǒu

閣真正會很久

koh tsin-tsiànn huì hěn jiǔ

來久久長長

lâi kú-kú-tn̂g-tn̂g

永永遠遠

íng-íng-uán-uán

生生世世

sing-sing sè-sè

將你疼惜

tsiong lí thiànn-sioh

阮做夢嘛會笑

gún tsuè-bāng mā ē tshiò

—

阮做夢嘛會笑

gún tsuè-bāng mā ē tshiò