今世之花

《今世之花》Kim-sè tsi Hue

吳梅燕Ngôo Muî-iàn

——————————————

紅花蕊滿山滿地

âng hue-luí muá-suann muá-tuē

開甲真美麗

khui kah tsin bí-lē

相親相愛來到山頂

siong-tshin siong-ài lâi-kàu suann-tíng

親像蝴蝶伴相隨

tshin-tshiūnn ôo-tia̍p phuānn-sio-suî

糖甘蜜甜的愛情

thn̂g-kam-bi̍t-tinn ê ài-tsîng

永遠無來離身邊

íng-uán bô lâi lī sin-pinn

親像花蕊當咧開

tshin-tshiūnn hue-luí tng teh khui

快樂笑微微

khuài-lo̍k tshiò bî-bî

想彼時美滿過日

siūnn hit-sî bí-muá kè-ji̍t

每擺伴相隨

muí-pái phuānn-sio-suî

無疑無悟

bô-gî bô-gōo

環境會來迫阮

khuân-kíng ē lâi pik gún

嫁予別个人

kè hōo pa̍t-ê lâng

每日悲傷珠淚滴

muí-ji̍t pi-siong tsu-luī tih

啥人會知阮心理

siánn-lâng ē tsai gún sim-lí

痛苦心腸放袂開

thòng-khóo sim-tn̂g pàng buē khui

親像針咧揻

tshin-tshiūnn tsiam teh ui

想早日雙人意愛

siūnn tsá-ji̍t siang-lâng ì-ài

約束著將來

iok-sok tio̍h tsiong-lâi

誰知中途會來拆開

siáng tsai tiong-tôo ē lâi thiah-khui

叫阮怎樣袂傷悲

kiò gún tsuánn-iūnn buē siong-pi

雖然離開伊身邊

sui-jiân lī-khui i sin-pinn

猶原每日思念你

iu-guân muí-ji̍t su-liām lí

欲到何時再相見

beh kàu hô-sî tsài sann-kìnn

總是由在天

tsóng-sī iû-tsāi thinn