酷刑

《酷刑》Khok-hîng
西卿 Se-khing
——————————————
為愛為情傷單純
uī ài uī tsîng siunn tan-sûn
遭遇失敗的命運
tso-gū sit-pāi ê miā-ūn
甜言蜜語無分寸
tinn-giân-bi̍t-gú bô hun-tshùn
真心真意掛喙脣
tsin-sim tsin-ì kuà tshuì-tûn

講啥物永遠不離分
kóng siánn-mih íng-uán put lî-hun
講啥物共享天倫
kóng siánn-mih kiōng-hiáng thian-lûn
全是欺騙阮
tsuân sī khi-phiàn gún
自古多情空餘恨
tsū-kóo to-tsîng khang î hūn
多情空餘恨
to-tsîng khang î hūn

伊是可比採花蜂
i sī khó-pí tshái-hue-phang
欲採花蕊毋愛欉
beh tshái hue-luí m̄ ài tsâng
真心愛伊無彩工
tsin-sim ài i bô-tshái-kang
伊是冷酷無情人
i sī líng-khok bô-tsîng lâng

講啥物引阮入戀夢
kóng siánn-mih ín gún ji̍p luân-bāng
為啥物好夢
uī-siánn-mih hó-bāng
偏偏變成傷心夢
phian-phian piàn-sîng siong-sim bāng
今生最愛伊一人
kim-sing tsuè ài i tsi̍t-lâng
最恨伊一人
tsuè hūn i tsi̍t-lâng

激心洗落面上粉
kik-sim sé lo̍h bīn-siōng hún
像風吹散巫山雲
tshiūnn hong tshue-suànn Bû-san hûn
裝男扮女合時陣
tsng-lâm pān-lú ha̍h sî-tsūn
猶恨猶愛真矛盾
iu hūn iu ài tsin mâu-tún

這就是勇敢拚生存
tse tsiū-sī ióng-kám piànn sing-tsûn
這就是意志堅強
tse tsiū-sī ì-tsì kian-kiông
抵抗著歹運
tí-khòng tio̍h pháinn-ūn
何日才會斷了愛
hô-ji̍t tsiah-ē tuān liáu ài
何時斷了恨
hô-sî tuān liáu hūn