命運的青紅燈
《命運的青紅燈》Miā-ūn ê Tshinn-âng-ting
西卿Se-khing
——————————————
紅燈阻止阮
âng-ting tsóo-tsí gún
毋通行這條險路
m̄-thang kiânn tsit tiâu hiám-lōo
是我好奇
sī guá hònn-kî
願意食鹹甜酸苦
guān-ì tsia̍h kiâm-tinn sng-khóo
愛人
ài jîn
被愛
pī ài
如秋風秋雨
jû tshiu-hong tshiu-hōo
女人的勇敢
lú-jîn ê ióng-kám
雖然勝過男子漢
sui-jiân sìng-kè lâm-tsú-hàn
但是離開母親彼日
tān-sī lī-khui bú-tshin hit-ji̍t
目屎像落雨
ba̍k-sái tshiūnn lo̍h-hōo
青燈指示阮
tshinn-ting tsí-sī gún
趕緊行這條好路
kuánn-kín kiânn tsit tiâu hó-lōo
躊躇毋行才失敗
tiû-tû m̄-kiânn tsiah sit-pāi
後悔心痛苦
hiō-hué sim thòng-khóo
情場失敗
tsîng-tiûnn sit-pāi
是自己錯誤
sī tsū-kí tshò-gōo
女人的勇敢
lú-jîn ê ióng-kám
雖然勝過男子漢
sui-jiân sìng-kè lâm-tsú-hàn
但是離開心愛的人
tān-sī lī-khui sim-ài ê lâng
目屎像落雨
ba̍k-sái tshiūnn lo̍h-hōo
紅燈青燈無迫阮
âng-ting tshinn-ting bô pik gún
行這條暗路
kiânn tsit tiâu àm-lōo
總是自己選擇的
tsóng-sī tsū-kí suán-ti̍k ê
理想前途
lí-sióng tsiân-tôo
浪漫寂寞的滋味濃厚
lōng-bān tsi̍k-bo̍k ê tsu-bī lông-hōo
女人的勇敢
lú-jîn ê ióng-kám
雖然勝過男子漢
sui-jiân sìng-kè lâm-tsú-hàn
但是想起阮的終身
tān-sī siūnn-khí gún ê tsiong-sin
目屎像落雨
ba̍k-sái tshiūnn lo̍h-hōo
