孤影

《孤影》Koo-iánn

西卿Se-khing

——————————————

春天百花滿地開

tshun-thinn pah-hue muá-tuē khui

鴛鴦水鴨喜相隨

uan-iunn tsuí-ah hí siong-suî

見景傷情吐大氣

kiàn-kíng siong-tsîng thóo-tuā-khuì

何時佮君再做堆

hô-sî kah kun tsài tsuè-tui

月娘明亮在天邊

ge̍h-niû bîng-liāng tsāi thinn-pinn

點點寒星閃閃爍

tiám-tiám hân-sing siám-siám-sih

孤單寂寞的暗暝

koo-tuann tsi̍k-bo̍k ê àm-mî

怨嘆月圓人袂圓

uàn-thàn ge̍h înn lâng buē înn

牛郎七夕會織女

Gû-nn̂g tshit-si̍k huē Tsit-lú

黃河也有澄清時

N̂g-hô iā ū tîng-tshing sî

暝日思念郎君伊

mî-ji̍t su-liām lông-kun i

怎樣佮君無會期

tsánn-iūnn kah kun bô huē-kî