緣投囡仔

《緣投囡仔》Ian-tâu Gín-á
江蕙Kang Huī
——————————————
緣投囡仔你幾歲
iân-tâu gín-á lí kuí huè
毋知娶某抑是未
m̄-tsai tshuā-bóo ia̍h-sī buē
阮未嫁你嘛未娶
gún buē kè lí mā buē tshuā
十七八歲當好娶
tsa̍p-tshit-pueh huè tng-hó tshuā
希望你毋通拖沙
hi-bāng lí m̄-thang thua-sua
趕緊來娶我
kuánn-kín lâi tshuā guá
酒袂啉筊仔袂跋
tsiú buē lim kiáu-á buē pua̍h
娶我穩快活
tshuā guá ún khuìnn-ua̍h

緣投囡仔真古錐
iân-tâu gín-á tsin kóo-tsui
害阮看著大心氣
hāi gún khuànn tio̍h tuā-sim-khuì
看著你心花就開
khuànn-tio̍h lí sim-hue tiō khui
真想欲佮你做堆
tsin siūnn-beh kah lí tsuè-tui
阮猶原生成真媠
gún iu-guân sinn-sîng tsin suí
袂予你克虧
buē hōo lí khik-khui
有佮意緊來相隨
ū kah-ì kín lâi sio-suî
毋通用喙水
m̄-thang iōng tshuì-tsuí

緣投囡仔有意愛
iân-tâu gín-á ū ì-ài
可惜恁某來阻礙
khó-sioh lín bóo lâi tsóo-gāi
枉費阮情深似海
óng-huì gún tsîng tshim sū hái
阮的傷心啥人知
gún ê siong-sim siánn-lâng tsai
希望你眾位朋友
hi-bāng lí tsiòng-uī pîng-iú
共阮鬥安排
kā gún tàu an-pâi
安排伊會得自由
an-pâi i ē-tit tsū-iû
予阮做翁婿
hōo gún tsuè ang-sài