哎喲哎喲

《哎喲哎喲》Aih-ioh Aih-ioh
江蕙Kang Huī
——————————————
心內愛啊愛著伊啊
sim-lāi ài–ah ài-tio̍h i–ah
毋敢講出喙
m̄-kánn kóng tshut-tshuì
阮只好偷偷看著伊
gún tsí-hó thau-thau khuànn-tio̍h i
想伊的模樣
siūnn i ê bôo-iūnn
像蝴蝶入花欉
tshiūnn ôo-tia̍p ji̍p hue-tsâng
飛來飛去
pue-lâi-pue-khì
完全揣無伊
uân-tsuân tshuē-bô i

夢啊夢啊夢著伊
bāng–ah bāng–ah bāng-tio̍h i
啊病啊病相思
ah pīnn–ah pīnn-siunn-si
阮茫茫渺渺過日子
gún bông-bông biáu-biáu kuè ji̍t-tsí
愛著一个人
ài-tio̍h tsi̍t-ê-lâng
嘛實在真費氣
mā si̍t-tsāi tsin huì-khì
戇神戇神咧想伊
gōng-sîn-gōng-sîn teh siūnn i

天星閃閃爍爍
thinn-tshinn siám-siám-sih-sih
笑啊笑規暝
tshiò–ah tshiò kui-mî
親像男男女女
tshin-tshiūnn lâm-lâm-lú-lú
愛戀的滋味
ài-luân ê tsu-bī
阮的心肝內
gún ê sim-kuann-lāi
咧等著你
teh tán tio̍h lí
你敢知阮的心意
lí kám tsai gún ê sim-ì

雨水滴滴沓沓
hōo-tsuí tih-tih-tap-tap
落啊落袂離
lo̍h–ah lo̍h buē-lī
一聲一滴
tsi̍t-siann tsi̍t-tih
親像替阮咧哀悲
tshin-tshiūnn thè gún teh ai-pi
只有過一暝
tsí-ū kuè tsi̍t-mî
敢若幾十年
kánn-ná kuí tsa̍p nî
阮相思過頭
gún siunn-si kuè-thâu
心綿綿
sim mî-mî

哎喲哎喲 相思又過頭啊
aih-ioh aih-ioh siunn-si iū kuè-thâu–ah
哎喲哎喲 思慕彼个人
aih-ioh aih-ioh su-bōo hit-ê lâng
哎喲哎喲 相思又過頭啊
aih-ioh aih-ioh siunn-si iū kuè-thâu–ah
哎喲哎喲 思慕彼个人
aih-ioh aih-ioh su-bōo hit-ê lâng
—

哎喲哎喲
aih-ioh aih-ioh
哎喲哎喲
aih-ioh aih-ioh
哎喲哎喲
aih-ioh aih-ioh
哎喲哎喲 思慕彼个人
aih-ioh aih-ioh su-bōo hit-ê lâng